عاجل.. بعولي العربية ولما حصلت مشكلة قالولى مش تبعنا.. مواطن يشتكي توكيل سيارات MG إم جي
اشتكى شخص من توكيل منصور لسيارات إم جي، بعد تعرض سيارته لمشكلة وامتناع التوكيل عن حلها.
وقال أحمد عبد القادر، صاحب المشكلة: سيارتي "MG HS" مرمية تحت الشمس عند توكيل منصور من أكتر من شهر.. وضمانها "ضاع" بقدرة قادر أنا موطن أجنبي عايش في مصر، وانسرقت وحقي ضاع ".
وتابع: بعد ما اشتريت عربية MG HS موديل 2023 وحطيت ثقتي كاملة في اسم كبير زي "منصور للسيارات" باعتباره التوكيل الرسمي والمفروض إنه أكتر جهة تقدر تضمنلي حقي كعميل.
واستطرد: القصة من الأول: قبل ما اشتري العربية، رحت كشفت عليها في التوكيل نفسه، وقالوا إنها سليمة ومفيش أي مشكلة جوهرية، إلا بعض الملاحظات البسيطة (الكشف نفسه مرفق بالصور وموضح فيه حالة القطع). العربية اتعمللها كل الصيانات الدورية "عندهم بالظبط" لغاية 100,000 كيلومتر - أول 60 ألف في الفرع الرئيسي ومن 70 لـ100 ألف في فروعهم المعتمدة (الفواتير مرفقة كدليل).
وتابع: بعد أقل من شهر من الكشف، العربية بدأت "تقطع" في المحرك وطلعت منها ريحة غريبة. لما وديتها لهم، قالوا "غالبًا طقم دبرياج" - مع العلم إن الكشف الرسمي بتاعهم كان مسجل حالة الطقم من 30 لـ40% بأقل تقدير ومش عارف ايه طقم الدبرياج الاي محتاج يتغير بعد 100 الف!! طلبوا مهلة 10 أيام "عشان يراجعوا الضمان مع الصين"، وقالوا لي حرفيًا: "احنا بس وسيط، مالناش دعوة بعد كده".
واستطرد: وبعد 10 أيام، فاجأوني إن العربية "خارج نطاق الضمان" بسبب تسريب مياه ووصلة "مغيرها أنا" - رغم إن كل الصيانة كانت بايديهم هم! النتيجة: العربية بقالها أكتر من شهر مرمية عندهم في الشمس، وأنا من غير عربية ومن غير حل..كلمت جهاز حماية المستهلك، وقدمت شكوى رسمية... ولحد دلوقتي بلا أي استجابة حقيقية.
واختتم قائلا: سؤالي ببساطة: إزاي توكيل بحجم منصور يكشف على عربية ويدّيها تقييم معين،" بمبلغ كبير" وبعد شهر يتنصل من نفس التقييم ده عشان يهرب من الضمان؟ وإزاي "الوسيط" يبيعلي عربية ويقول إنه مش مسؤول لما تحصل مشكلة؟
