شريف إكرامي يعلن اعتزال كرة القدم ويوجه رسالة للأهلي وبيراميدز (فيديو)

أعلن شريف إكرامي حارس مرمى بيراميدز والأهلي السابق، اعتزال كرة القدم، موجها الشكر لجميع الأندية التي لعب لها خلال مشواره وبصفة خاصة النادي الأهلي.

 شرف إكرامي يعلن اعتزاله

وقال شريف إكرامي في فيديو عبر حسابه على فيس بوك: "النهاردة جه اليوم اللي هودع فيه الملعب وهعلق فيه الجوانتي، قرار كل لاعب عارف انه هيجي في يوم من الأيام، انت مش بتسيب شغلانة انت بتسيب حياة كاملة، رحلة طويلة أكثر من 33 سنة، شكراً لكل نادي كان جزء من هذه الرحلة، فاينورد والجونة كل نادي فيكم علمني أمور كثيرة، وبيراميدز تشرفت أني ختمت فيه مسيرتي، وكنت محظوظ إني كنت جزء من أول جيل حقق بطولات للنادي وحفر اسمه في تاريخه.

أضاف: أما الأهلي فالكلام عنه مختلف تماماً، ليس مجرد نادي لعبت فيه، ولكنه المكان الذي ولدت فيه ونضجت وتعلمت فيه والناس عرفتني منه، وحققت فيه أحلامي كلاعب، الأهلي غير ومكانه في قلبي غير أي حد.

وواصل حارس المرمى السابق: "أشكر كل المدربين اللي اشتغلت معاهم، وكل لاعب وزميل شاركني أوضة اللبس أو الملعب، وكل عامل ودكتور وإداري ومدرب."

وأضاف: "أشكر الجماهير اللي ساندتني طول الرحلة، وعشت معاهم لحظات فرح وحزن، وكل لحظة سابت جوايا حاجة. وحتى الناس اللي انتقدتني أشكرهم، لأنهم كانوا سببًا في الشخص اللي أنا عليه النهارده."

واختتم رسالته قائلًا: "آخر وأكبر شكر لعيلتي، الناس اللي استحملت ضغوط الشغلانة أكتر مني، وكانوا دايمًا جنبي في وقت التصفيق وفي وقت الضغوط. النهارده بسيب الملعب، لكن مش هسيب اللعبة اللي ادتني أكتر مما كنت بحلم، وعلمتني عن الناس والدنيا والحياة، وإن السيرة الحلوة هي اللي بتفضل، مش النتائج ولا البطولات."