عاجل.. متضررون من الأهلي صبور: «الشركة بتفتح مشروعات جديدة ولسه ماسلموش الملاك حقهم»

استغرب عدد من المتضررين من شركة الأهلي صبور ترويج الشركة لمشروعات جديدة في الوقت الذي يعاني فيه عملاء الشركة من عدم استلام وحداتهم.

وقال أحد المتضررين: "نداء للمهندس أحمد صبور، زي ما كل المجهود والزيارات دي معمولة لتسويق مشروعات الساحل، لازم يكون في زيارات للمشروعات اللي تأخر تسليمها من 2022، والملاك بيحاولوا من فترة طويلة طلب مقابلة حضرتك، لكن للأسف موظفو الشركة بينفون إمكانية مقابلتك.. كفاية تأخير".

ونظم عدد من المتضررين من عملاء شركة الأهلي صبور وقفة داخل مقر الشركة للمطالبة بحقوقهم في استلام وحداتهم، محذرين من الشركة أو التعامل معها بسبب تأخرها في مواعيد تسليم الوحدات.

وقال أحد المتضررين من الأهلي صبور: "لما أكون متعاقد مع شركة الأهلي صبور في مارس 2018، وموعد استلامي بناءً على العقد آخر 2022، وخلصت كل أقساطي تمامًا، وهو واخد فلوسه على داير مليم، وإحنا حاليًا في يونيو 2026 والعمارة ما اتعملش فيها حاجة على الأرض، ولما أجي أسأل هستلم إمتى يقولولي آخر 2027، ده لو صدقوا في كلامهم، يبقى هل ده يرضي ربنا؟".

وتابع: "تأخير 5 سنين على الاستلام، هل ده مقبول أو منطقي؟! طيب مين يعوضني الـ5 سنين تأخير دي؟ ومين يعوضني وقف الحال ده؟ لما أجي أنا أو حد من الملاك نتكلم مع الشركة نلاقي عدم اهتمام وعدم تقدير، وكأننا ضيوف تقال على قلبهم وغير مقبولين ليهم. ده إنتوا يا شركة خيرنا عليكم، إحنا كعملاء وكملاك إنتوا عايشين وبتقبضوا من فلوسنا، ولما نطالب نقابل رأس الشركة أو من ينوب عنه يرفضوا ويخلونا نقابل موظف لسه شغال من قريب".

وقال: "أكبر غلطة الواحد عملها إنه وثق في اسم الأهلي صبور واشترى معاهم.. ياريتني كنت روحت اشتريت من مقاول عادي، كان هيلتزم أكتر من الأهلي صبور".

وقال متضرر آخر: "للأسف الشديد الشركة من 4 سنين بتأجل الاستلام باستمرار كل 6 شهور، وإدارة الشركة وعود مفيش حاجة منها بتتنفذ. ولما الملاك طلبوا يقابلوا صاحب الشركة، رفضوا لهم. والمصيبة الأكبر إن الشركة بتفتح التعاقد في مشروعات جديدة، وكأن الشركة أصبح مجال عملها تحصيل شيكات المواطنين وليس التطوير العقاري".