يتناول جزءً من تاريخ مصر الحديث.. أحمد كمال بكشف لـ"مصر تايمز" كواليس مشاركته في فيلم "القصص"
كشف الفنان أحمد كمال كواليس مشاركته في فيلم "القصص"، مؤكدًا أن التعاون مع المخرج والمؤلف أبو بكر شوقي كان من أبرز الأسباب التي شجعته على خوض التجربة.
أحمد كمال : فيلم "القصص" من الأعمال التي ستعيش طويلًا
وقال أحمد كمال في تصريح خاص لـ مصر تايمز: "اللي جذبني لفيلم القصص هو أبو بكر شوقي، لأن من زمان جدًا وأنا بسمع عنه كمخرج متميز وأفلامه المختلفة ورؤيته الفنية الخاصة، فكنت مهتم جدًا إني أشتغل معاه، وفرحت لما رشحني للدور. أنا بحب أشتغل مع المخرجين اللي عندهم تفكير مختلف وطموحات فنية وبيحبوا التجريب وعندهم شجاعة فنية."
وتحدث كمال عن طبيعة الفيلم، قائلًا: "الفيلم اجتماعي لكنه يحمل أبعادًا سياسية وتاريخية، وكل شخصية فيه بتعبر عن الفترة الزمنية دي بطريقتها ومن خلال تكوينها الإنساني، هو فيلم يتناول جزءًا من تاريخ مصر الحديث من خلال شخصيات طبيعية جدًا."
وأضاف: "أجسد شخصية راغب الأب وهي شخصية مصرية خالصة، راجل بسيط يحب نادي الزمالك، عنده أحلام وطموحات عادية، ومشغول بمشاكله اليومية، مش مثقف كبير ولا زعيم سياسي، لكنه إنسان بيحاول يعيش حياة أسرية هادئة وسعيدة، وخلال الأحداث يواجه أزمات كبيرة زي مرض زوجته وإهمال علاجها، وفقدان ابنه في حرب 1967 وغيرها من التحديات."
وعن تعاونه مع المخرج أبو بكر شوقي، قال أحمد كمال: "أبو بكر شوقي مخرج متميز جدًا، وميزة الشغل معاه إنه مؤلف ومخرج الفيلم في نفس الوقت، وبيكون عارف بالضبط هو عايز إيه. بييجي التصوير وهو شايف المشاهد في خياله بشكل واضح، وبيحاول يحقق الصورة دي مع فريق العمل، وفي نفس الوقت بيسيب مساحة مهمة للممثلين عشان ينطلقوا ويطلعوا أفضل ما عندهم."
وتابع: "هو كمان بيحب الممثلين جدًا وبيتعامل مع الجميع باحترام كبير، سواء نجم أو ممثل عنده مشهد واحد فقط. من وجهة نظري هو شخص نادر، ومن الصعب تلاقي مخرج في سنه عنده كل الحكمة والإبداع والإخلاص ده."
واختتم أحمد كمال حديثه لـ مصر تايمز قائلًا: "فيلم القصص إضافة مهمة جدًا لمسيرتي الفنية، والحمد لله اشتغلت مع مخرجين كبار في أفلام مهمة، وكنت دائمًا بدور على الأعمال اللي تسيب أثر وتعيش مع الجمهور. إحنا عارفين إن في أفلام بتعيش وأفلام بتختفي بسرعة، وأنا مؤمن إن فيلم القصص من الأفلام اللي هتفضل موجودة وهتعيش لسنوات طويلة."
