عمر شرقي لـ«مصر تايمز»: أول مرة أعمل دور شعبي في«وننسى اللي كان».. وخوفت الناس تكرهني في دور«وحيد السباعي»|حوار
كشف الفنان عمر شرقي كواليس مشاركته في مسلسل «وننسى اللي كان»، والصعوبات التي واجهته في تقديم شخصية وحيد السباعي، خاصة أنها المرة الأولى التي يجسد فيها دورًا شعبيًا.
كما تحدث الفنان عمر شرقي في حوار خاص لـ«مصر تايمز» عن تحضيراته للشخصية، وكواليس العمل مع الفنانين كريم فهمي ومنة فضالي، وردود فعل الجمهور على الدور.. وإلى نص الحوار:
في البداية.. حدثنا عن شخصية وحيد السباعي في مسلسل «وننسى اللي كان»؟
شخصية وحيد السباعي هي أخو بدر، والمفروض إن في مشاكل كبيرة بينهم بسبب أحداث حصلت في حياتهم، وده بيخلي الأخ متمرد عليه، فبنلاقي إن وحيد مش بيحب بدر وبيشتغل مع أعدائه، اللي هما محمد لطفي ومحمود حافظ، وتتوالى الأحداث بعد كده ويحصل تغير كبير في الشخصية.
كيف جاء ترشيحك للدور؟
اللي رشحني للدور أستاذ محمد الخبيري، ودي كانت خطوة مهمة بالنسبة لي.
ما أبرز التحديات التي واجهتك أثناء تقديم الشخصية؟
واجهت تحديات كتير جدًا، خاصة إن دي أول مرة أعمل دور شعبي، ومكنتش حابب آخده بشكل سطحي أو "من على الوش"، كنت عايز أفهم طريقة الكلام والحركات والتفاصيل الخاصة بالشخصية، وكمان أقنع نفسي بالدوافع اللي تخلي وحيد يعمل الحاجات القاسية دي في علاقته مع أخوه. فمذاكرة التفاصيل دي كانت تحدي كبير بالنسبة لي.
كيف استعددت للشخصية؟
استعديت بمذاكرة الورق كتير جدًا، وكنت بروح لـ كريم فهمي المكتب كل يوم ونشتغل على الورق ونطلع تفاصيل للشخصية، كمان حاولت أتخيل شكله ولبسه يبقى عامل إزاي، وده كان بالاتفاق مع المخرج والاستايلست.
ما المشهد الأقرب لقلبك في العمل؟
أكتر مشهد بحبه هو مشهد في الحلقة 26، مشهد 12 تحديدًا.. كنت شايل همه جدًا من أول ما بدأنا تصوير، لأنه المشهد اللي الشخصية فيه بتتقلب وبتتصالح مع بدر، وبقول له "متسبنيش"، كنت خايف هل الجمهور ممكن يتقبل التحول ده ويتفاعل معاه ولا لأ.
كيف كانت ردود فعل الجمهور على الدور؟
بحب كل ردود الجمهور حتى السلبية، لأنها بتأكد لي إن الناس صدقت الشخصية، أكتر تعليق بيسعدني لما حد يقولي: "أنا صدقتك جدًا"، لأني بحس ساعتها إني وصلت الرسالة. ردود الأفعال كانت مرعبة وفيها كمية حب وتشجيع كبيرة، وأول مرة أحس إن الناس متأثرة بالدور بالشكل ده.
ماذا عن كواليس العمل مع أبطال المسلسل؟
بصراحة أنا مكنتش متوقع إن يكون ليا نصيب من النجاح الكبير ده، لكن كنت عارف إن ياسمين عبد العزيز فنانة كبيرة، مشاركتي في المسلسل من أهم الخطوات الفنية في حياتي.
أنا أعرف كريم فهمي من سنة 2017، فمكنتش قلقان من الشغل معاه، لكن في البداية كنت قلقان شوية من منة فضالي لأني مكنتش عارف طبعها، لكن دلوقتي بقت أكتر من أختي، الحقيقة إن في كيميا كبيرة بينا إحنا التلاتة وكنا دايمًا نتمنى إن مشاهدنا تزيد.
ماذا تعلمت من هذه التجربة؟
اتعلمت منهم إني أبقى ذكي اجتماعيًا، يعني لما أبقى عايز حاجة أعرف إزاي أطلبها بالشكل المناسب.
ما رأيك في الجدل حول نسب المشاهدة في موسم رمضان؟
أنا مليش في إثارة الجدل، لأن الحاجة الحلوة بتتشاف لوحدها، كل اللي بيتكلموا نجوم كبار ومتشافين، وكل يوم ترتيب المسلسلات الأعلى مشاهدة بيتغير على المنصات، أنا شايف إن كل الناس عملت شغل حلو جدًا.
وما خططك القادمة؟
أتمنى يجيلي دور بنفس الحجم أو أكبر، ونفسي كمان أشتغل في عمل أوف سيزون.
