خطوات الاستعداد للشتاء.. لمناعة أقوى ومظهر جذاب
كلها أيام تفصلنا عن فصل الشتاء، ومع أول إحساس ببرودة الطقس ورائحة المطر لازم نبدأ نغير طريقة تفكيرنا ونستعد للموسم الجديد. الاستعداد للشتاء مش بس بيكون في الملابس، لكنه كمان في مناعتنا، وديكور بيتنا، وحتى حالتنا النفسية.
تجهيز الملابس
ابدأ بترتيب ملابس الشتاء وغسلها وتعطيرها، وخلي أول طبقة تلبسها دايمًا قطنية علشان تمتص العرق وتحافظ على حرارة جسمك. بعد كده اختار خامات دافئة ومريحة، والألوان حاول تكون مريحة للعين وتشعرك بالدفء زي البني، البيج، النبيتي، أو الأخضر الزيتوني.
نشّط مناعتك وعزّز قوتها
جسم الإنسان بيحتاج وقت يتأقلم على تغيّر الفصول، خصوصًا مع قلة ضوء الشمس. لذلك، ابدأ يومك بكوب مياه دافئة عليه عصير ليمون، لأنه بينشط المناعة وينقي الكبد.
زود كمان أكلاتك بالخضروات والفواكه الغنية بفيتامين “سي” زي الجوافة، البرتقال، الكيوي، والفلفل الألوان. وممكن تعمل سلطات شتوية مقوية للمناعة فيها السبانخ، الرمان، الجزر، المكسرات، مع عصير ليمون وزيت الزيتون — وجبة غنية بمضادات الأكسدة ومغذية جدًا.
ولازم المشروبات الدافئة تكون عادة يومية زي الشاي بالزنجبيل والعسل، أو الكركم بالحليب، أو التفاح المسلوق بالقرفة — كلها مشروبات بتطرد الكسل وتقوي المناعة في نفس الوقت.
جهز بيتك لاستقبال الشتاء
الشتاء بيحب الأماكن الدافئة والمريحة، وعلشان تحقق الإحساس ده، ممكن تضيف بطانية خفيفة على الكنبة، أو شموع برائحة الفانيليا أو القرفة أو البرتقال. زود كمان مساحة اللون الأخضر في بيتك بنباتات الزينة أو حتى بحجر من أحجار الطاقة زي الأميتيست أو الروز كوارتز، لأنها بتقلل الإحساس بالكآبة اللي ممكن نحسه في الليالي الباردة الطويلة.
استقبل الشتاء بتفاصيل بتحبها، وجهز جسمك وملابسك وبيتك، والأهم روحك. علشان لما ييجي البرد، تكون مستعد بالدفء اللي جواك مش بس اللي حواليك.
قد يهمك أيضا:
جربها يوناني.. فوائد الجبن القريش لا تتخيلها لصحتك وإنقاص الوزن
للشعور بالدفء.. أفكار لديكور شتوي في صالونك (صور)
قبل بدء الشتاء.. حيل بسيطة لتخزين الملابس الصيفي بأمان
لموسم الشتاء.. 4 طرق مختلفة ومبتكرة للبطاطا الحلوة
خبير يكشف سر تقوية جهاز المناعة بمكون طبيعي
