ابنة محمد مرزبان بعد رحيل والدها: «سيبت فراغ كبير أوي قلبي واجعني»

وجهت شهد ابنة الفنان محمد مرزبان رسالة مؤثرة لوالدها الراحل، وذلك بعد رحيله عن عالمنا بأسبوع، وذلك نتيجة حادث مأسوي. 

ابنة محمد مرزبان توجه رسالة مؤثرة لوالدها

وكتبت شهد من خلال حسابها الرسمي عبر موقع التواصل الاجتماعي فيسبوك، قالت: يا بابا عدى أسبوع من ساعة ما مشيت، ولسه مش قادرة أصدق إن دي الحقيقة، لسه مستنياك تدخل من الباب أو أسمع صوتك بتناديني، مش قادرة أستوعب إني مش هشوفك تاني ولا هسمع صوتك إلا في الصور وvoice notes اللي بقيت بسمعها كل يوم و اسمع نصايحك ليا و "صباح الفل يا شهوده"  عشان أصبّر نفسي.

أضافت: كل يوم بصحى من النوم بتمنى إنه يكون كابوس وإن مفيش حاجة حصلت و اشوفك تاني، كان نفسي تقوم بالسلامة و تشوف حب الناس من اللي تعرفك واللي متعرفكش، وكان نفسي تسمع الكلام الحلو اللي بيتقال عليك من كل الناس، والناس اللي وقفت جنبنا ومعانا وبتعمل ده من حبها فيك، وقد إيه سيرتك طيبة و حلوه احنا عشنا ولسه وهنفضل عايشين متشرفين إنك أبونا.

تابعت: كان نفسي في حاجات كتير أوي لسه نعملها مع بعض؛ خروجات، وسفريات، وقعدة البيت ناكل على سفرة واحدة، وحسن وحمزة يصدعوك من كتر الكلام، وفرح Jessy وAhmed، وفطار يوم الجمعة بعد الصلاة، قعدتنا نتفرج علي فيلم و نتجمع نتفرج علي ماتش و حاجات كتير أوي اوي اوي.  

استكملت: مشيت وسيبت فراغ كبير أوي قلبي واجعني يا بابا، بس أنا حلمت بيك واطمنت إنك بخير وفي مكان أحلى بكتير، وربنا بعتلنا علامات كتير تطمّنا عليك يا حبيبي، كان نفسي أقولك كل يوم إني بحبك. كان نفسي أحضنك وأبوسك كل يوم. كان نفسي أقولك كل يوم إنك أعظم أب في الدنيا.

أختتمت: بس انا هفضل كل يوم ادعيلك و احاول اكون نسخه تانيه منك و اعمل الحاجات الحلوه و الخير اللي كنت بتعملها، و اربي عيالي انهم يبقي شبهك و زيك.. بحبك اوي يا حبيبي يا روح قلبي. و ان شاء الله نتقابل في الجنه.. الله يرحمك يا حبيبي.