صفوة: قبلت أدوار من أجل المال.. وكرهت الرجالة وقلبي استنزف

أثارت الفنانة صفوة الجدل خلال الساعات القليلة الماضية، وذلك بعد تصريحاتها في آخر لقاء لها مع إنجي علي، حيث كشفت عن العديد من الجوانب والأسرار الخفية في حياتها. 

أبرز تصريحات صفوة عن العمل والرجالة

في البداية تحدثت صفوة عن لجوئها في بعض الأحيان لقبول أدوار من أجل المال، حيث قالت: بعمل أدوار مش راضية عنها عشان أعيش، موضحة إنها تضطر توافق على أدوار لا تعجبها ولا تشعر بالرضا عنها بسبب الظروف المادية، وقالت إن لقمة العيش ساعات بتكون أقوى من الاختيار الفني. 

كما تحدثت عن الرجل وإمكانية زواجها، مشيرة إلى أن الست الحلوة حظها وحش مع الرجالة، بس مش كلهم، لكنها استدركت أن حظها هي وحش مع الرجالة كلها، وأعلنت صراحة أنها كرهت الرجالة، وردت بغضب على سؤال بيتكرر كتير وهو لو جالك حد دلوقتي هتوافقي، واعتبرت أن السؤال ده قلة أدب، خاصة أنها اتجوزت وجدة دلوقتي، وأكدت أنها لو جالها الونس مش هتلبس فستان وتتصور لأنها مش هتحب تاني وقلبها استنزف خلاص ومفيش عندها حاجة تديها لأي حد، وأن اللي فاضل في قلبها حفيدها أخده وجالها في الوقت الصح. 

في وقت سابق، قالت الفنانة صفوة إنها انفصلت عن زوجها الثاني بسبب رغبته في عدم عملها كراقصة واتطلقت منه مقابل عدم إخبار أهلها بأنها تعمل راقصة.

وتابعت صفوة: اتجوزت زوجي الثالث وكنت بشتغل علشان أجيب له فلوس، وهو ده اللي كان يهمه ويشغله، وكنت بصحى من النوم على الحمام وأعمل كوافير وماكيير وألبس وأطلع من الشقة على الرقص، وأرجع البيت مش شايفة وأفطر وأنام. 

أضافت صفوة: والبودي جارد بتوعي كانوا إخواته والسواق أخوه وأخته المسئولة عن اللي شغالين في البيت، وإخواته الباقيين كانوا بيتناوبوا علينا، وكان عليا شبكة طول الوقت وعرفت بعد كده إني هبلة وعبيطة وكان بيستغلني علشان الفلوس، وبسببه لبست قضية ضرائب ودخلت القفص مع 14 واحد لو شوفت واحد منهم بره ممكن يغمى عليا، ولكن ضربات قلبي كان يسمعها اللي على باب المحكمة.