سرقة هاتف صحفية أمام قسم مصر القديمة: اتاخد من إيدى وأنا فى العربية وقافلة نص الشباك

تعرضت الصحفية دنيا شمعة لسرقة هاتفها أمام قسم مصر القديمة من داخل سيارتها.

وكشفت دنيا تفاصيل الواقعة قائلة: موبايلي اتسرق امبارح (وانا ماسكاه جوه العربية وقافلة نص الشباك) بمنتهى الجرأة على الكورنيش قدام قسم مصر القديمة مش فاهمة ده ازاي يحصل أصلًا بس تمام.. وطبعًا بعد ما الحرامي اختفى في ثواني في دقيقتين كنت جوه القسم نفسه وعاوزة أعمل محضر.

وتابعت: الناس هناك كانت متعاونة وفاهمين الموقف وحاولوا يساعدوني.. بس هو انا مطلوب مني انا اللي اقف قدام الكاميرات وافرغ وادور على العربية كانت واقفة فين بنظري اللي بشوف بيه بالعافية اصلا؟.. بعيدا عن سعر الموبايل وأني لسه شرياه من شهور قليلة جدًا.. بس هقول مش مهم، الداتا اللي على التليفون بقا اللي مربوط بيها شغل الصحافة بتاعي كله وحسابات شغلي وكل حاجة حرفيًا.. دي هقول عليها هي كمان مش مهم؟ واستنى بقا شهور يا الموبايل يرجع يا ميرجعش؟

واستطردت: واللي فهمته ان الموضوع بياخد وقت على ما يقدروا يعملوا تتبع.. الوقت ده عشان اعرف اشوف شغلي يبقى لازم اشتري  تليفون جديد وعشان اعرف احط عليه نفس الداتا يبقى مش هدفع دلوقت اقل من 75 ألف جنيه تاني!! اتمنى بجد يبقى في اي حاجة واي اجراءات بتحصل اسرع من اللي سمعته في القسم (عشان يا الموبايل يرجع يا ميرجعش كمان).

وتابعت: وبأكد تاني السرقة تمت على الكورنيش وعلى بعد أمتار معدودة من قسم مصر القديمة في مكان كله كاميرات ومتراقب الساعة 8 عادي جدًا.. وحددت كمان للناس في القسم الدقيقة اللي اتسرقت فيها بالظبط  (مش في مكان مهجور مثلًا)!!!.