عاجل..ضحايا منصور عامر وشركة المطورون العرب يستغيثون: خربوا بيوتنا وبقالنا 13 سنة ماستلمناش الوحدات

هاجم عدد من الملاك شركة المطورون العرب وعامر جروب، رجل الأعمال منصور عامر، متهمينه بضياع أموالهم و شقي عمرهم والتعنت فى تسليمهم وحداتهم السكنية.

المطورون العرب

وقال الملاك فى هجومهم، «منصور عامر خرب بيوت ناس كتير اشترو في بورتوكايرو ونيو كايرو واكتوبر» ، وتابع اخر: بقالنا 13 سنة مش عارفين نستلم وحداتنا وشقي عمرنا خدوه. 

وقال الملاك فى استغاثتهم: من سنة 2013 واحنا الاف الاسر المصرية عايشين في دوامة ظلم ملهاش اخر، ناس اشترت شقق ومحلات في مشاريع شركة المطورون العرب عامر جروب، ودفعنا فلوسنا كاملة، تعب عمر وشقا سنين، على اساس عقود واضحة بتقول ان الاستلام في 2015، وعلى اساس احلام بسيطة، بيت نعيش فيه، محل نسترزق منه، مستقبل نطمن عليه.

وتابعوا: عدت السنين، 2015 عدت، وبعدها 2016 و2017 و2018، لحد ما المشروع اكتمل شكليا وافتتح الهايبر ماركت اخر 2019، والنهارده احنا في 2025 ولسه الاف الملاك لا استلموا استلام حقيقي ولا شافوا عائد ولا حتى عرفوا حقوقهم فين، عشر سنين كاملة من الانتظار، من القلق، من الوعود اللي على الورق بس.

واستطردوا: المكان اللي بنتكلم عنه مش اي مكان، ده مشروع في قلب التجمع، قدام الجامعة الامريكية، واجهة من اهم واجهات مصر، المفروض يكون نموذج مش مشكلة، لكن اللي حصل العكس، ادارة فاشلة، تعطيل، منع استلام فعلي، استلام حكمي بخطابات من غير ما المحلات تكون جاهزة من جوه، شراء على مساحة كلية ويتم التعامل بالايجار على مساحات اقل من الصافي المكتوب في العقود، ومنع الملاك حتى من الاطلاع على عقود الايجار الخاصة بمحلاتهم.. ازاي في اغلى منطقة في التجمع يكون الايجار ارقام متدنية جدا لا تليق بالمكان ولا بالسوق، وازاي الملاك ميعرفوش اي حاجة عن عقود الايجار ولا عن مدة الادارة ولا عن مصير مشروع دفعوا فيه كل اللي يملكوه، ازاي شركة باعت كل او معظم الوحدات ولسه بتتصرف وكأنها المالك الوحيد، تغير مخطط هندسي، تلغي مميزات اتباع على اساسها، وتاخد مساحات للانتفاع من غير موافقة الملاك".

وقالوا : احنا كمان مش عارفين الارض ملك مين، الشركة ولا جهة تانية، مش عارفين حقوقنا عند مين، والمشكلة اكبر لان الشركة اسمها بيتغير، ومجلس ادارتها بيتغير، واسهمها بتتباع في البورصة، واحنا كملاك ثابتين في الارض ومش ثابتين في الحقوق.

وقالوا: بنناشد سيادة رئيس الجمهورية، بنناشد كل مسؤول عنده ضمير في البلد دي، يشوف اللي بيحصل، يسمع صوتنا، يقعد معانا، لاننا واثقين ان مفيش حد في مصر يرضى باللي بيحصل ده لو شافه بعينه، والموضوع مش بيمس اسر مصرية بس، ده كمان بيمس صورة مصر قدام عرب كتير اشتروا واستثمروا واتظلموا زينا".