يوسف رأفت عن معاناته قبل دخوله الفن: اشتغلت بـ 40 جنيه وكنت برجع البيت مكسور
كشف الفنان الشاب يوسف رأفت، عن مواجهته الكثير من التحديات والصعوبات في بداية دخوله مجال الفن، وذلك بعد النجاح الكبير الذي حققه بمشاركته في مسلسل “سيد الناس” الذي عرض خلال موسم دراما رمضان 2025.
نشر يوسف، عبر خاصية الاستوري علي صفحته الشخصية بموقع "إنستجرام"، صورة له في البدايات وكتب عليها قائلا: «عمري ما هنسى البداية شغل في مكتب كاستنج بـ 40 جنيه في اليوم، وشغل مجاميع وسط ناس كتير محدش واخد باله مني، كنت برجع البيت مكسور، حاسس إني صغير أوي، لكن جوايا يقين كبير إن ربنا شايف وبيكتبلي طريق».
وأضاف يوسف: «الطريق كان مُر مليان خوف وشك وتعب، بس الحقيقة إن اللحظات اللي كادت تكسرني هي نفسها اللي بنتني كل دمعة نزلت كانت دعوة، وكل صبر مر كان باب نعمة مفتوح مستني أوانه».
كما تحدث عن سعادته بنجاحه، قائلا: «النهاردة لما أبص ورايا أعرف إن ربنا كريم أوي كريم لدرجة إنه يرفعك من ولا حاجة ويخليك تبقى حاجة من مكان محدش يعرف اسمك فيه لمكان الناس كلها تبصلك وتقول: سبحان من بيده كل شيء».
وتابع: «رسالتي لأي حد بيحلم متستهونش بالبدايات البسيطة، لأن ربنا قادر يحول أضعف بداية لأعظم نهاية، الحمد لله على كل خطوة، والحمد لله أكثر على النعم اللي عمري ما توقعت أوصلها، ولسه اللي جاي مع ربنا أعظم».
