ياسمين الخطيب تهاجم الشيخ يعقوب: "بيتخذ الزوجة الرابعة للمتعة فقط"

هاجمت الإعلامية ياسمين الخطيب، الشيخ محمد حسين يعقوب، كونه تزوج فتاة في العشرينات من عمرها بعدما طلق زوجته الرابعة.

وكتبت الخطيب عبر حسابها الرسمي بموقع التواصل الاجتماعي "فيس بوك"، الشيخ محمد حسين يعقوب (بتاع أختاااااه.. احذري) طلق مراته الرابعة عشان يتجوز بنت أصغر منه ب 40 سنة! وجدير بالذكر إنه بيتخذ الرابعة للمتعة فقط، يعني بتترمي وتيجي غيرها كل كام سنة.. ولا كام شهر.. كأنها طقم ملايات أو كنبة في الصالون.. فضيلة الشيخ اتجوز 22 مرة في 7  سنين!. 

وتابعت: " ده إللي بيقول لكم إن الزواج مودة ورحمة ورباط مقدس.. ده إللي بينصحكم بالزهد في الدنيا والطمع في الآخرة. بينما هو غرقان لحد دقنه في نعيم الدنيا.. في النسوان، والفتة واللحمة، والقصور والعربيات، والفلوس إللي عملها من محاضراته وبرامجه، إللي بتتفرجوا عليها وتصدقوه يا كروديات!". 

وقالت في منشور آخر :" لا هامسح البوست السابق ولا هاغير رأيي..أن تكون مهووساً بالنساء (نسوانجي) ليست تهمة، خاصة في مجتمعاتنا التي تُقدِّر الفحولة، وتحتفي بالعناتيل.. بس ما تسـتشـيخـلناش! ويعني إيه هو حر طالما بيتجوز ويطلق على سنة الله ورسوله! سنة الله ورسوله بتقول إن الطلاق حلال (عند الحاجة إليه)، ولكنه أبغض الحلال إلى الله.. سنة الله ورسولة بتقول إن الزواج مودة ورحمة، مش شقة مفروشة!   لافتة :" ورداً على إللي بيهاجموني..أيوه يا سيدي تزوجت على سنة الله ورسولة 3 مرات (مش 22 مرة في 7 سنين)! وعلى سنة الله ورسولة أيضاً  طُلقت في كل مرة بعدما استحالت العشرة (مش عشان أغير عتبة)! وليس لدي ما أخفيه أو أخجل منه. 

واختتمت حديثها قائلة: " والأهم إني لا أقدم نفسي للناس على إني داعية اسلامية.. أقدم نفسي كتشكيلية وإعلامية وكاتبة، لدي آرائي التي قد تتفق أو تختلف معها.. لكني لا -ولن- أتلون لأعجب أحد.. بس انتم تموتوا في إللي يشتغلكم".