الرئيس السيسي لأهالي العريش: "إحنا مش بنشتغل ضدكم"
تحدث الرئيس عبدالفتاح السيسي، على مطالبات منح مزيد من الحريات للمجتمع خلال الفترة المقبلة، قائلاً، "الناس عايزة تعيش.. طب إزاي؟ حد يقول ندي للناس فرصة للحريات أكتر صح.. بس الناس مش هتفضل تتكلم، هتسيبك وتطلع على البحر تهاجر"، جاء ذلك في كلمته خلال افتتاح محطة "تحيا مصر" متعددة الأغراض بميناء الإسكندرية، اليوم الخميس.
الرئيس السيسي لأهالي العريش: "إحنا مش بنشتغل ضدكم"
وأضاف الرئيس السيسي: "كنت بقول دايما إن البنية الأساسية في أفريقيا تحتاج لآلاف المليارات عشان الناس تعيش وتوقف القتال.. الناس بتقاتل بعض ليه؟ علشان مفيش أمل.. وعلشان يكون فيه أمل محتاج تبني كتير قوي".
وتابع: "بنحفر مستقبل بلدنا.. بحكي الحكاية علشان الناس يسمعوني كويس.. كل طوبة بتتعمل في البلد دي أنا شايفها، بنعمل الطريق دا ليه؟.. المستقبل بتاع البلد لو مفيش بنية أساسية تليق بدولة مش هتعملوا مستقبل خالص.. هو إحنا حرمنا الناس علشان نعمل دا يا كامل.. بنقسو على نفسنا شوية .. بنحاول نعمل حاجة علشان إحنا كمان نعيش".
وقال الرئيس عبدالفتاح السيسي، إن الدولة تعمل على تطوير ميناء العريش، بصورة تليق بالمدينة ومحافظة شمال سيناء بالكامل، مضيفاً، "العريش ميناء قديم، والمثلث عشان أعمل ده كله، ألاقي ناس موجودة ونعوضها".
وتوجه الرئيس السيسي برسالة لأصحاب الوحدات السكنية في ميناء العريش: "إحنا مش بنعمل ده ضدكم، لكن لأجل بلدنا ولأجلكم تلاقوا شغل لكم ولأولادكم ومستقبل يليق بالعريش وكل سيناء".
وأوضح الرئيس السيسي، "فيه في البحر المتوسط 500 ألف يخت، لكن حصتنا منهم لسه ضعيفة علشان كده اتحركنا في سياحة اليخوت، وقلت لهم الموافقة على سائح اليخت في نص ساعة زي أي دولة في العالم.. وبقول لأهالينا في سيناء والعريش، الكلام ده بنعمله علشانكم، علشان تشتغلوا وولادكم يشتغلوا، ومصر كلها تستفيد".
وطمأن الرئيس عبدالفتاح السيسي، سكان الميناء القديم في العريش، قائلا: "في العريش في الميناء القديم ، علشان أعمل المثلث ده ألاقي فيه ظهير وناس موجوده فنعوضها ، وبقولهم وهما سامعيني احنا مش بنعمل ده ضدكم .. احنا بنعمل ده لأجل بلدنا ولأجلكم ..وعلشان تلاقوا شغل ليكم ولأولادكم ومستقبل يليق بالعريش وكل سيناء".
جاء ذلك خلال افتتاح الرئيس السيسي لمحطة تحيا مصر متعددة الأغراض بميناء الإسكندرية، وأعمال التطوير في الميناء، إضافة إلى مراسم رفع علم مصر على السفينة وادي الملوك.
ومن المقرر أن يشهد الرئيس السيسي خلال الحفل افتتاح عدد من المشروعات عبر الفيديو كونفرانس، منها ميناء 6 أكتوبر البري وأعمال التطوير الشامل بميناء السلوم البري حاجز أمواج ميناء دمياط ورصيف الأخشاب والغلال بالميناء.
حضر الافتتاح الفريق أول محمد زكي القائد العام للقوات المسلحة وزير الدفاع والإنتاج الحربي، ووزير النقل المهندس كامل الوزير، وعدد من الوزراء وكبار رجال الدولة.
وتعتبر محطة "تحيا مصر"متعددة الأغراض من أهم المشروعات التي تنفذها وزارة النقل في مجال النقل البحري، وتشتمل المحطة على ساحات تداول تبلغ نصف مليون متر مربع، وتنقسم إلى 3 محطات تداول (حاويات - بضائع عامة - سيارات).
وتعد المحطة إحدى الروافد الرئيسية للمحطة اللوجستية التي تم إنشاؤها خلف الميناء مما يسهم في رفع تصنيف ميناء الإسكندرية.. والهدف من هذه المحطة أن تكون محطة ذكية خضراء تعمل بأفضل الوسائل الحديثة في شحن وتفريغ وتداول البضائع سواء حاويات أو البضائع العامة.
