سهير جودة تهنئ شريهان بعيد ميلادها: قاهرة المستحيل وتخلق من كل نهاية بداية جديدة

هنأت الإعلامية سهير جودة، الفنانة شريهان، بمناسبة عيد ميلادها، الذي يوافق 6 ديسمبر من كل عام، قائلة: هي أكثر مثل  شوفناه لإنسانة بتحب التحدي وبتحب المستحيل، بتعمل المستحيل.

 دايما تلاقي عنقها مرفوع في الصور كانها العنقاء

وأضافت سهير في تصريحات تليفزيونية، قائلة: شوفنا عندها معجزتين حصلوا في حياتها، وخرجت منهم وكل معجزة قادرة تنهي اي حد  لكن واضح انها محترفة في مواجهة المستحيل وبتستمتع بعبور الحواجز واحد بعد التاني.

وتابعت سهير: دايما تلاقي عنقها مرفوع في الصور كانها العنقاء اللي بتبتدي من اول وجديد، وهي قمر  و نموذج لبنات كتير وستات كتير بشكلها وشعرها وحركاتها.

وأشارت: شريهان شئ مختلف تماما، حالة لوحدها يعني زيها زي العنقاء اللي بتخلق نفسها من الرماد  وتعيد تاني بناء اسطورتها دون الحاجة لأحد، مفيش حد اختلف على شريهان فنيا، وهي بتبعد وتستسلم في صمت، هي بتعود و تبدأ من جديد وكأنها بتبني اسطورة جديدة.

وأوضحت: شوفناها في اعلان في رمضان السنة اللي قبل اللي فاتت، وشوفناها في مسرحية كوكو شانيل، هي كأنها جوهرة حقيقية بجد، بتعمل وجود خلاق طول الوقت، بتخلق من كل نهاية بداية جديدة، وكل نهاية هي بتكون على القمة دايما.

واختتمت: شريهان مرت باربع امتحانات كبرى في حياتها لكنها قاهرة للمستحيل، أكيد مرت بدعوات وحب الناس، شاريهان عندها وجه لا يخطئه الحزن وربما يزيده سحرا، حزن غامض يمكن كلنا منفهموش ولكنه لائق عليها لانه صادق، وخلف هذا القناع هناك حقيقة رائعة جدا.