الجمعة 29 مارس 2024 الموافق 19 رمضان 1445
رئيس التحرير
حازم عادل
فن وثقافة

ريهام سعيد تعلن اعتزالها الإعلام نهائيًا (صورة)

الأربعاء 21/يوليو/2021 - 09:26 ص
الإعلامية ريهام سعيد
الإعلامية ريهام سعيد

أعلنت الإعلامية ريهام سعيد، فى الساعات الأولى من صباح اليوم الأربعاء، اعتزالها العمل الإعلامي نهائيًا من أجل التفرغ للتمثيل. 

وقالت الإعلامية عبر حسابها الشخصي بموقع "إنستجرام"، فكرت كتير قبل ما أكتب البوست ده.. أنا اعتزلت التمثيل سنة 2015 لأني حسيت إن صاحب بالين كداب وإن التمثيل مأثر علي مسيرة الخير اللى ابتديتها من سنين طويلة عشان الوقت والمجهود اللى بعمله.. لكن عشقي للتمثيل اللى هو دراستي ومهنتي الأولي قبل الإعلام رجعت أمثل تاني وأنا لسه في نظر المخرجين والمنتجين مذيعه عايزه تمثل".

وتابعت: "كنت عارفة إن عشان أخد مكان كممثلة لازم أسيب الإعلام زي مع حفظ الألقاب داليا البحيري وبسمة ودينا فواد ودينا الشربيني وغيرهم بس مكنتش قادره أسيب رسالتي اللي كانت مهمة أوي وقتها.. أنا حصل لي مشاكل كتير من المهنة دي بتأثير باطل من السوشال ميديا من منافسين وأعداء بسبب المشاهدة العالية جدًا والنجاح أنا تعبت وحاسه أني قدمت كل اللي ممكن يتقدم والدولة عاملة اللي عليها ومش محتاجين دور المجتمع المدني في مساعده الناس ولكن أنا ليا الشرف أني اشتغلت في المهنة العظيمة دي اللي ليها رسالة سامية وعظيمة وليا الشرف أني كنت إعلامية في أصعب وقت مر على الإعلاميين أيام حكم الإخوان والحمد لله كان لينا موقف واضح وماتغيرش ولا دقيقة". 

وأوضحت ريهام سعيد: "أنا الحمد لله حققت في التمثيل وكل اللي اشتغلته علم مع الناس واشتغلت أعمال كلها قيمة بس بعد ما جالي السكر وشويه مشاكل تانية قررت أعمل اللي بحبه أنا بكل أسف بعلن اعتزالي الإعلام تمامًا وهاركز كممثلة وهاطلب من الدكتور أشرف زكي أنه يساعدني أني أغير الفكره الموجودة في أذهان المخرجين والمنتجين أني مذيعة، ورسالة للأستاذة كاملة أبو ذكري ومش مكسوفة نفسي أوي أمثل معاكي حتي لو مشهد ده من أحلامي.. خطوة صعبه وفيها ريسك كبير بس على الأقل أجرى ورا حلمي حتي وأنا في السن ده.. جه الوقت اني استمتع بالي بعمله وبحبه خصوصا لما يكون في عصر ولا في واسطة ولا محسوبيه اللي هايجتهد هايوصل". 

وأتمت: "ماتسيبوش حلمكم مهما فات الوقت.. بشكر جمهوري من الأمهات والشباب والأطفال اللي دائما بيدعموني وحبه برامجي واتعلموا منها وبشكر ربنا على عشرين سنة اداني الفرصه فيهم أني أقضي حوائج الناس وأقدم كل ما هو مفيد.. فخورة بكل حلقة وبكل حرف قدمته 20 سنة تعب وسهر وتصميم على تقديم الحقيقة.. أنا أسفه ليكوا بس التمثيل رساله برضوا وهو حلمي الأساسي اللي اتاخرت أوي عشان أحققه يارب وفقني وساعدني".