ماجد المصري يتحدث عن فرحة الجماهير ويشيد بأداء منتخب مصر
أشاد الفنان ماجد المصري بحالة الفرحة التي عاشتها الجماهير العربية احتفالًا بتأهل منتخب مصر إلى دور الـ16 بكأس العالم، مؤكدًا أن ما حدث عكس حجم المحبة والترابط بين الشعوب العربية.
ماجد المصري يتحدث عن فرحة الجماهير
وقال خلال مداخلة ببرنامج "الساعة 6" المذاع على قناة "الحياة": «اللي حصل امبارح كان أقل واجب تجاه مصر، الوطن العربي كله شعب واحد، وكلنا قلب واحد، وكلنا بنحب مصر، وإحنا بنحبهم وهم كمان بيحبونا».
وأضاف: «اللي حصل امبارح كان وحدة وطنية على مستوى عالي جدًا، وما شاء الله عليهم.. بجد كنت أتمنى أكون موجود بره مصر وأشاركهم الفرحة، ونفرح لمصر من وسط فرحتهم.. حتى لو كنت موجود في أي دولة عربية، كنت هحس إني وسط إخواتي وحبايبي، والناس كلها كانت بتفرح من قلبها، وفرحتها كانت طالعة بصدق».
وأكد أن المشهد أثبت عمق العلاقات بين الشعوب العربية، قائلًا: «المشهد كان جميل جدًا، وأثبت إن المحبة بين الشعوب العربية موجودة، وكانت فقط محتاجة مناسبة كبيرة زي دي علشان تظهر بالشكل اللي شفناه».
وعن أجواء متابعته للمباراة، أوضح: «اتفرجت على المباراة مع عيلتي، وكنا في مكان خارج البيت لأني كنت راجع من السفر، واتابعنا المباراة وسط أجواء كلها حماس، ومش عايز أقولكم على فرحة الناس بعد نهاية اللقاء. الزغاريد المصرية كانت في كل مكان، والناس كانت بتحتفل في الشوارع، وكل واحد كان بيعبر عن فرحته بطريقته».
كما كشف عن ثقته في المنتخب قبل نهاية اللقاء، وقال: «كان عندي ثقة كبيرة جدًا.. أنا بحب كرة القدم، وبفهم فيها كويس جدًا، وكمان بلعب كورة، وعشان كده كنت شايف إن المنتخب بيلعب بأسلوب خلاني متأكد إننا هنحقق الفوز.. الأداء كان مطمئن، وكان واضح إن اللاعبين عندهم إصرار كبير، وده كان أول سبب خلاني واثق إن التأهل هيكون من نصيبنا».
ووجّه ماجد المصري رسالة دعم إلى محمد هاني، قائلًا: «أنا بقدم كل الدعم والحب والتقدير للكابتن محمد هاني، وبقوله: إحنا كلنا معاك.. المدافع بيلعب في أخطر مكان في الملعب بعد حارس المرمى، وأي غلطة منه بيكون ثمنها كبير جدًا، ولازم نعذره».
وأضاف: «أنا شخصيًا بدعم محمد هاني، وبقوله: إنت كابتن كبير جدًا، وبتحب مصر جدًا، فكمل يا بطل، وإنت واحد من رموز المنتخب القومي، وإن شاء الله ربنا يوفقك في اللي جاي».
وتابع: «أتمنى إن رسالة الدعم دي تنتشر بين الناس، لأن مش كل الناس بتفهم تفاصيل كرة القدم. لاعب كبير ممكن يقدم مباراة ممتازة، وبعدها يخطئ، وده شيء طبيعي جدًا. الناس مش في مكانه علشان تحكم عليه».
وأشار إلى أن أخطاء المدافعين تكون أكثر تأثيرًا من غيرهم، موضحًا: «كل مهاجمينا قبل كده ضيعوا أهدافًا كانت مضمونة بنسبة كبيرة جدًا، وده طبيعي في كرة القدم، لكن المدافع لأن مركزه حساس، بيشيل المسؤولية كلها».
كما أثنى على قائد المنتخب محمد صلاح، قائلًا: «شفت الفيديو بتاع محمد صلاح بعد ما حسمنا الفوز، وهو رايح يسلم على لاعبي أستراليا.. إيه الرقي ده؟ وإيه الإنسانية دي؟ وإيه الأخلاق دي؟ دي حاجة تشرف أي حد».
واختتم حديثه قائلًا: «في الوقت اللي كل الناس كانت بتحتفل، محمد صلاح راح يواسي لاعبي المنافس ويسلم عليهم.. دي قمة الشياكة والاحترام والروح الرياضية، ومحمد صلاح قيمة كبيرة، وكلنا بنتعلم منه.. وألف مبروك لمصر، وألف مبروك للوطن العربي كله، وإن شاء الله نفرح بانتصارات أكتر، وتفضل الفرحة دي مستمرة لكل المصريين والعرب».
