بعد "ورد على فل وياسمين".. ياسمين غيث تعلق على أعمال السرطان: "كفاية"

تحدثت الفنانة ياسمين غيث عن تكرار الأعمال الدرامية التي تعتمد على مرض السرطان كجزء أساسي من أحداثها، ويظهر خلالها أحد الأبطال في رحلة مقاومة المرض، وذلك بعد عرض مسلسل "ورد على فل وياسمين".

ياسمين غيث تعلق على أعمال السرطان: “كفاية”

واستعادت ياسمين تجربتها في مسلسل "حلاوة الدنيا" الذي عُرض عام 2017، والذي شاركت فيه مستندة إلى تجربتها الحقيقية مع محاربة السرطان، مؤكدة أن العمل كان مختلفًا بسبب تناوله للمرض بشكل واقعي وإنساني.

وكتبت ياسمين غيث عبر حسابها على موقع "فيسبوك": «لما اتعرض عليا (حلاوة الدنيا) فى مرحلة تجهيزه فى 2016 وقتها مشيش قال لى بنعمل مسلسل عن السرطان وعايزين نوصل منه رسالة تفاؤل للناس عن المرض ده زى ما انتى بتعملى على السوشيال ميديا دلوقتى وفيه دور عايزينك تعمليه».

وأضافت: «لما بدأت أقرأ الورق، لقيت إنچى وسما كاتبين المسلسل بطريقة واقعية جدًا وفعلاً المسلسل ماكانش من النوع الكئيب اللى يقفل الناس ويخوفهم من المرض ده، لأن فعلاً الواقع بتاع المرض ده إن فيه ناس مش بتخف منه وفيه ناس بتخف منه وبيبقوا كويسين وبيكملوا حياتهم عادي».

وتابعت ياسمين: «نيجى بقى للكام السنة اللى فاتوا.. للأسف أنا بقيت حاسة إنها طلعت موضة، أو كل ما المؤلف يتزنق فى قصة، يخلى البطل أو البطلة عندهم سرطان، وكمية العبث والحاجات غير الواقعية بقى اللى بتتقال وتتعمل عن المرض اللى معظمها مش صح 100% فى حلاوة الدنيا اختارونى لسبب، كانوا عايزين الموضوع يكون بجد وحقيقى وواقعى من حد عاش التجربة بنفسه».

واستكملت: «لكن بجد اللى بيحصل دلوقتى ده تهريج، خلاص بقينا بين كل مسلسل والتانى، بنخلى حد من الأبطال مريض سرطان، الموضوع بقى دمه تقيل جدًا وبقى يخلينى وأعتقد زيى ناس كتير نزهق، مانكملش المسلسل، بدأ الموضوع يقلب مُبتذل جدًا ومُمِل، فكفايه يا جماعة والنبى، حاولوا تبقوا مبدعين أكتر من كدة بالله عليكوا».

واختتمت منشورها قائلة: «وشوفوا قصص تانية بقى خلاص براڤوا كلكم مشيتوا على الموضة وعملتوها، كفاية بقى وشوفوا موضة جديدة لو سمحتم.. شكرًا».

وأضافت: «وده كان أول تجربه من نوعها فى الوقت ده وأول مسلسل تقريبًا يتكلم مباشرةً عن السرطان.. وخلوا سليم يعيش علشان يدى أمل للناس، أمل حقيقى مش مزيف علشان فعلًا فى مرضى سرطان فى المخ بيعيشوا لو اتعالجوا صح، ورجعوا هبة من السفر برده وخلوها تعيش وتدى أمل للناس علشان برده ده بيحصل».

واختتمت: «المسلسل كان الوحيد من نوعه وده اللى ميزه قوى وقتها، أكيد فى أعمال اتكلمت عن موضوع السرطان قبل كدة، بس حلاوة الدنيا كان مختلف والناس لسة فاكرينه وبيشوفوه وبيحبوه ومش بيخافوا يشوفوه».