"المرض كشف كل حاجة".. سامح صفوت يثير الجدل بتصريحات قوية
كشف الفنان سامح صفوت تفاصيل الأزمة الصحية التي تعرض لها بعد صلاة عيد الأضحى، والتي نُقل على إثرها إلى المستشفى، مؤكدًا أن هذه المحنة كشفت له حقيقة الكثير من الأشخاص المحيطين به.
"المرض كشف كل حاجة".. سامح صفوت يثير الجدل بتصريحات قوية
وكتب سامح صفوت عبر حسابه على "فيسبوك": "الحمد لله على الشدة اللي عرفت الواحد مين اللي ظهر وقت التعب ومين اختفى.. المرض كان وجع بس نعمة من عند ربنا لازم نشكره عليها، لأنه كشف الناس الأصيلة اللي دعواتها كانت بتوصل".
وأضاف: "ولولا الشدة اللي الواحد مر بيها مكنش هيعرف الفرق بين شخصيات في حياته، مين الصاحب الجدع وابن الناس الأصيل اللي وقف جنبه، حتى لو معرفتي بيه كانت جديدة، ومين اللي كان بيني وبينه عيش وملح وعشرة سنين طويلة وماعملش بيها وكان صاحب مصلحة".
وتابع: "الواحد متربي من والده ووالدته، الله يرحمهم، إنه يصون العيش والملح ويراعي العشرة، سواء في الحياة الشخصية أو العملية، لكن ناس كنا فاكرينهم قريبين اتبخروا، وناس ماكناش متوقعينها كانوا أول ناس تسأل وتدعي وتقول كلمة طيبة".
واستكمل: "درس والواحد اتعلمه ومش هيتنسى.. الحمد لله عدت على خير، وطالع منها متعلم حاجة جديدة، زي ما بيقولوا الإنسان طول ما هو عايش بيتعلم".
ووجّه رسالة شكر لجمهوره ومتابعيه قائلًا: "إنتوا بالنسبة لي أهلي وإخواتي وعيلتي الكبيرة، بشكركم من كل قلبي على كل كلمة ودعوة طيبة، كمية الدعوات اللي جاتلي وأنا تعبان كانت فوق الوصف".
وأضاف: "حسيت إني بتعافى بفضل ربنا ثم دعواتكم اللي وصلتلي وكانت سند ودعم، وحسستني إن الدنيا لسه بخير وفيها ناس صافية ونقية".
واختتم رسالته قائلًا: "ربنا ما يحرمنيش من محبتكم، وما يكتبش على حد المرض والضيق والشدة، بس لو جت اعرف إنها هتنضف حياتك.. وحسبي الله ونعم الوكيل، وفوضت أمري لله في كل من آذاني وكان السبب فيما جرى".
