عاجل| تجربة مريرة.. مواطن يحذر من سيارات "بايك": "اشتريت عربية بمليون جنيه وطلعت معيوبة"

حذر مواطن من سيارات بايك وخاصة بايك U5 بلس ، بعد تجربته مع السيارة وعيوبها، مستعرضا مشكلته قائلا: خلاص غُلب حماري حرفيًا لأني اشتريت عربية بمليون جنيه وبايظة دون وجود اي بوادر لحل الأزمة من التوكيل ..شهر ١١/٢٠٢٦ اشتريت عربية بايك U5 بلاس من فرع بايك لألكان أوتو في التجمع الخامس واستلمتها من فرع الشيخ زايد

وتابع: وفي يوم ترخيص العربية ( اللي هو أول يوم اتحرك بالعربية ) زجاج سيارة السائق أتعطل والحقيقة فضلت في الشارع حوالي 3 ساعات مش عارف اسيب العربية وامشي لحد ما بجرب قفل معايا حجزت الصيانة وروحت فرع الشيخ زايد ومنها تم توجيهي إلى ابو رواش علشان اقعد ٥ ساعات وفي الاخر يتم إبلاغي الجهاز غير متوفر

واستطرد: بعد اسبوع تم إبلاغي بتوفر الجهاز وروحت وركبت الجهاز والحمدلله .. اقل من شهر وحصل نفس العطل في زجاج السيارة علشان الف نفس اللفة بالظبط من الشيخ زايد لابو رواش .. كمان اسبوعين وللمرة التالتة يحصل نفس العطل ..ولكن المرة دي تم إبلاغي ان ده عيب في ضفيرة الكهربا وهي اللي بتحرق الجهاز .. الضفيرة دي غير متوفرة دلوقتي هتكون متوفرة بعد العيد مباشرةً ( عيد الفطر )

واستطرد: استنيت بعد العيد شهر كامل لحد شهر ٤ ومحدش عبرني طبعًا .. تواصلت معاهم وكان الرد معلش شهر كمان .. لحد ما من أسبوع سمعت اغرب رد ( الجهاز موجود ومتوفر لكن ضفيرة الكهربا هي المشكلة لانها ممنوعة من دخول مصر !!! ) فهنحاول نحل ان شاءالله

وتابع عن مشكلته مع سيارة بايك U5 بلس : استنيت اسبوع كمان ومفيش رد .. آخر خطوة كانت من ٣ ايام .. عملت شكوى اخيرة في الكول سنتر لان معظم المحادثات السابقة كانت واتس اب .. وكان الرد حد هيكلم حضرتك بكرة ( الاربعاء ) متقلقش .. وطبعًا محدش تواصل معايا

واختتم مشكلته مع سيارة بايك U5 بلس ، قائلا: حضرتك مدخل عربية مصر وانت مش عارف تدخل قطعة اساسية في كهربا العربية وبتبيع وللاسف أنا واحد من المتضررين والله اعلم فيه غيري ولا لا إلى جانب شاشة العربية اللي بتفصل يوميًا تقريبًا في اي مشوار بس ده موضوع تاني .