هند عاكف تستعيد ذكريات الطفولة في شم النسيم: كنا بنلوّن البيض كل سنة|خاص

أعربت الفنانة هند عاكف عن سعادتها بعودتها إلى مصر لقضاء عيد شم النسيم وسط أسرتها، مؤكدة أن هذا اليوم يحمل لها الكثير من الذكريات الجميلة منذ الطفولة.

هند عاكف تكشف كواليس احتفالها بشم النسيم 

وقالت في تصريح خاص لموقع «مصر تايمز»، قالت هند عاكف إنها اعتادت كل عام الاحتفال بشم النسيم مع أسرتها، مضيفة: «مبسوطة إني رجعت مصر يوم شم النسيم علشان أقضيه مع أسرتي الكريمة، إحنا متعودين كل سنة نجيب البيض ونلونه، وده كان بيحصل من وإحنا أطفال، لينا ذكريات حلوة أوي مع اليوم ده».

وتابعت: «كنا بنجيب الملانة والخس والكابوتشا ونعمل الرنجة سلطة، وكمان الطحينة والفسيخ، والحاجات دي كلها كانت جزء أساسي من طقوسنا في شم النسيم».

وأضافت: «إخواتي دلوقتي مجهزين لي وليمة فيها فسيخ ورنجة، وهروح أتغدى معاهم، لكن مش هآكل البيض الملون لأنه خلص في الفطار، وإحنا صغيرين كنا بنتجمع أنا وإخواتي وبابا وماما في اليوم ده».

واستعادت ذكرياتها قائلة: «كنا ساعات بنقضي شم النسيم في النادي أو في أماكن مختلفة، وكان والدي بيحجز لنا، وأحيانًا كان بيبقى عندي شغل في اليوم ده، لكن له ذكريات جميلة جدًا في حياتي».

واختتمت حديثها قائلة: «سعيدة إني بقضي شم النسيم النهارده في مصر وسط أسرتي وأخواتي وفي أجواء مليانة حب وذكريات جميلة».