سلوى عثمان في حوار لـ"مصر تايمز": "كلهم بيحبوا مودي" تجربة كوميدية ممتعة.. وهذا سر رقصي وغنائي
أعربت الفنانة سلوى عثمان عن سعادتها بالمشاركة في مسلسل كلهم بيحبوا مودي، مؤكدة خلال حوارها مع «مصر تايمز» على هامش حضورها حفل السحور بمناسبة مرور 5 سنوات على تدشين الموقع أنها تجربة مختلفة أعادتها إلى أجواء الكوميديا بعد فترة من الغياب.. وإلى نص الحوار:
في البداية.. ما الذي جذبكِ للمشاركة في مسلسل «كلهم بيحبوا مودي»؟
مشاركتي في المسلسل جميلة جدًا، وأنا سعيدة بيها، خاصة إني بقالي فترة معملتش كوميدي، والسنة دي رجعتله من خلال عمل لايت كوميدي خفيف ولطيف.
وكيف وجدتِ التعاون مع فريق العمل؟
العمل مع النجم ياسر جلال ممتع جدًا، دمه خفيف، وكذلك الفنانة ميرفت أمين اللي أعتبرها اكتشاف كوميدي خطير، وكمان أيتن عامر عاملة شخصية حلوة أوي، أنثى وبنوتة لطيفة رغم إنها شغالة في مدبح، وشخصيتها عاقلة، ولما بتتجوز مودي بتبقى أشيك.
وكواليس التصوير كانت تجنن، وياسر ومحسن دمهم خفيف.
وماذا عن طبيعة الكوميديا في المسلسل؟
الكوميديا هنا كوميديا موقف أكتر من إنها إيفيهات مباشرة، والناس كلها دمها خفيف وعاملاه بشكل حلو جدًا.
كيف تستعدين لشخصياتك؟
لما ببقى مبسوطة بالحاجة اللي بعملها مش بحس إني محتاجة مجهود كبير للتحضير، بدخل ألاقي نفسي جوا الشخصية، وأول ما بلبس لبسها وأحط الميكب وأقول كلامها بلاقي نفسي بطلع كل اللي جوايا، وده بيديني دفعة قوية للأداء.
ما أكثر تعليق أسعدك على دورك؟
من أكتر التعليقات اللي جاتلي إنهم قالوا يُحسب لياسر جلال إنه خلّى سلوى عثمان ترقص وتغني وتزغرط في مشهد فرح بنتي «أيتن عامر»، لأن الجمهور عمره ما شافني بضحك بالشكل ده قبل كده.
