الدماطي لجماهير الأهلي: الحضور في الدوري لا يقل أهمية عن مباريات أفريقيا
وجه محمد الدماطي، عضو مجلس إدارة النادي الأهلي، رسالة مهمة لجماهير القلعة الحمراء عبر حسابه الرسمي على فيسبوك.
وكتب الدماطي: «حتكلم في البوست ده بصفتي مشجع أهلاوي قبل ما أبقي عضو مجلس إدارة، وعارف حجم الأبواب اللي حتتفتح عليا، بس أنا مش بعرف استخبي مهما كان درجة عدم رضاك عن الإدارة أو الفريق أو أي شيء».
وأستكمل: «ده مش مبرر أبدا لضعف الحضور الجماهيري في مباريات حاسمة في الدوري، لو هي ظاهرة عامة ممكن أقول فقدان شغف أو مشاكل مع الجمهور، لكن لما يبقي الحضور كامل العدد في ماتشات أفريقيا وعدد قليل جدا في مباريات الدوري يبقي إيه السبب، هل بنوصل رسالة للاعبين إن الدوري مش مهم؟ مفيش أي مبرر منطقي للتفاوت ده، ومش حندفن راسنا في الرمل ونعمل مش واخدين بالنا ، كل البطولات مهمة، والتواجد الجماهيري ده لوحده بيحسن الأداء».
وقال : «أنا على مدار عمري كنت اكتر فترة لازم ابقي موجود فيها في المدرج والفريق محتاجني عشان يكسب».
وأضاف الدماطي في رسالته: «نقفل على نفسنا شهرين بس، نركز مع حاجة واحدة إننا نزق فرقتنا لقدام لحد آخر الموسم، نشجع ونروح الاستاد، ونسيب أي انتقادات على جنب دلوقتي عشان مش مهم الأشخاص، محدش حيفتكر حاجة غير البطولات في الآخر».
وأختتم: «المهم الأهلي، الأهلي وبس. ياريت الناس المؤثرة تتبنى الاتجاه ده، كل حاجة لسه في إيدينا، وإن شاء الله ربنا حيكرمنا في الآخر».
