عاجل| عربية موديل 2022 ولعت لوحدها.. مواطن يحذر من التعامل مع توكيل مرسيدس مصر ويخاطب الشركة الأم

تعرض مواطن لحريق مفاجئ فى سيارته المرسيدس دون أسباب واضحة، مستغيثا من مماطلة التوكيل فى مصر دون معرفة سبب الحريق لسيارته.

وقال صاحب الشكوي عبر صفحته على السوشيال ميديا: عربية مرسيدس موديل 2022 تولّع فجأة بدون أي سبب واضح… والتوكيل ومرسيدس مصر بقالهم شهور بيماطلوا بدون قرار حابب أحكي تجربتي كاملة ويمكن حد مرّ بحاجة مشابهة أو يقدر يساعدني قانونيًا أو إعلاميًا، يوم الجمعة الموافق 28 / 11 / 2025 كنت نازل أصلي الجمعة واتجهت لمسجد لأول مرة في التجمع، قدام الجامعة الأمريكية ناحية بنزينة شيل أوت. دخلت البنزينة أسأل على طريق المسجد فقط ومحطتش بنزين".

وتابع: أنا خارج من البنزينة فجأة: العربية ابتدت تطلع دخان كثيف من الناحية اليمين أنا جوه بنزينة = خطر حقيقي عليّ وعلى الناس وقفت العربية فورًا ونزلت أدور على أي حد يساعدني جبنا طفاية وحاولنا نفتح الكبوت لكن كان سخن جدًا والنار فضلت تزيد لحد ما فريق محطة البنزين تدخل وسيطر على الحريق، بس بعد ما الكبوت بالكامل اتحرق.

وعن مواصفات السيارة قال: العربية مرسيدس موديل 2022 لسه في الضمان كل الصيانات داخل التوكيل (ستار الوطنية) واتصلت بالشرطة وتم عمل محضر إثبات حالة. 

وكلمت التوكيل وجم أخدوا العربية ونش ووصلناها التوكيل والسبت رحت التوكيل: قالولي إنهم مالهمش قرار، وإن الملف هيتبعت لمرسيدس الشركة الأم وإنهم هيحللوا السبب ويبعتوا وفد من ألمانيا يحدد سبب الحريق.

واستطرد : بعد 4 أيام إدوني عربية بديلة وبعد أسبوع قدمت شكوى في حماية المستهلك، وتاني يوم التوكيل ومرسيدس مصر كلموني وقالولي: الأفضل توقف الشكوى علشان مانخش في مسار قضائي طويل، وخلينا نستنى رد الشركة الأم وثقت في الكلام ده ووقفت الشكوى.
ومن ساعتها لحد النهارده: ولا قرار و لا تقرير فني ولا تحديد سبب الحريق ولا إصلاح ولا استبدال ولا تعويض

وقال: دخل شهر 12 وقالولي مرسيدس في إجازة رأس السنة شهر كامل. الإجازة خلصت… ولسه نفس الكلام: بنبعت أسئلة للشركة الأم بيردوا علينا ولسه مفيش قرار إحنا بنتكلم دلوقتي على شهور من الانتظار بدون أي نتيجة..سؤالي بكل وضوح: هل الطبيعي إن عربية في الضمان تولع فجأة؟ هل الطبيعي إن عميل يفضل الشهور دي كلها بدون قرار؟ هل ده مستوى خدمة يليق باسم مرسيدس؟