معيوبة الصنع.. عميل يحذر من توكيل عز العرب وسيارة بروتون ساجا| عاجل
اشتكي عميل من سيارة بروتون وتوكيل عز العرب ، بعد شرائه سيارة جديدة واكتشافه عيوب بها ورفض التوكيل استرجاعها.
وقال العميل عبر حسابه الشخصي على موقع التواصل الاجتماعي، «عندي مشكلة بخصوص عربية بروتون ساجا - مو 2025 تجميع محلى اشتريتها من أبو زيد اوتوموتيف - فرع مدينتي توكيل عز العرب للسيارات العربية كنت جايبها لمراتي و بنتي في الجامعة »
وتابع:«قبل ما أسرد المشكلة أحب أوضح اني التزمت اقصى درجات ضبط النفس والتعامل الاحترافي مع كل الاطراف عن طريق شكاوى رسمية للاطراف المعنية عن طريق الرقم المختصر والبريد الالكترونى والشكاوى المقدمة لبروتون ماليزيا الشركة الام وشكاوى لجهاز حماية المستهلك المصرى ».
وقال:«رفضت اني ألجأ للسوشيال ميديا غير مُجبراً وبعد استنفاذ جميع المحاولات الودية والرسمية وحق الرد مكفول لكل الأطراف
وسرد المشكلة قائلا:«المشكلة بدأت لما اشتريت سيارة بروتون ساجا مو 2025 تجميع محلى شاسيه رقمCAFBT3SRLSA000900
موتور رقم S4PEXY5196
Pearl black colour من ابوزيد اوتوموتيف فرع مدينتى بضمان توكيل عز العرب
يوم الخميس 6 / 11 / 2025 الساعة 6 م
فور خروجي من المعرض حسيت بصونة ونة جامدة في المحرك وبمجرد وصولي للبيت بحوالي ساعة واحدة لمبة الفتيس ولمبة ال check engine light
نورت في التابلوه وصوت الونة كان بيزيد والعربية كان العداد بتاعها ٥٥ كم فقط
توجهت للمعرض احاول ارجع العربية رفض تماما وقالى مشكلتك مع الوكيل»
وتابع :رفعت العربية على ونش وتوجهت ل توكيل عز العرب في ابو رواش اللي استلم العربية وبعد الفحص بلغنى ان كان فيه مشكلة في الكهرباء وفيه عيب صناعة في بلية الكاتينة هاتتطلب انه يغير بلية الكاتينة وشداد وسير الكاتينة بالكامل .. انا رفضت اصلاح العربية وتغيير منظومة الكاتينة وتمسكت بحقى في ارجاع السيارة واسترداد تمن السيارة بالكامل حسب قانون حماية المستهلك المصرى».
وتابع: بعد شكاوى واتصالات كتير
عرض التوكيل كان استبدال العربية ورفض الارجاع توجهت بشكوى لجهاز حماية المستهلك اللي قرر ارجاع المبلغ المدفوع بالكامل وصدر القرار في 29 ديسمبر 2025 لكن التوكيل والمعرض في موقف في منتهى الغرابة رفضوا التنفيذ وقدموا تظلم ع القرار عشان يكسبوا وقت اكتر والخسارة تزيد عليا برغم مرور شهرين ونص على شراء العربية وتكبدي خسارة مالية كبيرة كل يوم عن استخدام اوبر و كريم بدل العربية اللي اشتريتها
وقال:توكيل بدل ما يتعاطف مع العميل ويقف جمبه بيبيعه للمعرض اللي برضه وقف ضد العميل ورفضوا ارجاع الفلوس اللي لو كان توكيل او معرض بيتعامل بطريقة احترافية كان المشكلة اتحلت من اول يوم من الاخر الكل طلع خسران من القضية .. انا خسرت فلوسى ٣ شهور قابلين للزيادة وخسرت فلوس بأدفعها كل يوم مواصلات بس دة ها اخدهم تعويض مناسب بالقانون المصري
وتابع: توكيل عز العرب خسر ثقة العميل وخسر كل اللي بيفكر يشتري عربية نازلة بدون فحص و بعيب صناعة بيظهر بعد 55 كم فقط وبعد ساعة واحدة من استلام العربية..عربية مش بتبيع بالشكل المناسب وبتسلموها بعيب صناعة واضح في الفتيس وسيستم الكاتينة وبترفضوا في الاخر حل المشكلة.
