مسؤول بـ"سيراميكا" ينتقد حكم مباراة الفريق أمام الأهلي: "ركلة الجزاء واضحة للجميع"
أبدى معتز البطاوي، المشرف على الكرة في نادي سيراميكا كليوباترا، استياءه الشديد من القرارات التحكيمية في مباراة الأهلي بنصف نهائي السوبر.
وقال البطاوي في تصريحات تليفزيونية: "مكنتش أتمنى أتكلم على حاجات تطلع شكلنا وحش، لأن احنا شوفنا كل حاجه كويسة وحلوة في التنظيم هنا في الإمارات".
وأضاف معبرًا عن شعوره بالظلم: "لكن إن احنا نحس بظلم أو لعيبتك تحس بظلم، حتى يا سيدي لو أنا وحش بس لو ليا ضربة جزاء احسبها".
وتابع منتقدًا الحكم وتقنية الفيديو: "أنت محسبتهاش، في فار يحسبها، الكرة واضحة أمام الجميع".
وتطرق إلى أنباء متداولة قائلًا: "في أنباء بتقول ان مباراة الأهلي وسيراميكا كانت تكريم للكابتن محمود البنا.. نتمنى ذلك والله.. بس في كابتن عاشور كمان في تقنية الفيديو".
وأكد على أحقية فريقه في ركلة جزاء، قائلًا: "مكنتش أتمنى اتكلم عن التحكيم المصري بالشكل ده.. بس لينا ضربة جزاء كل الناس شافتها".
وحدد اللاعب المتسبب في الخطأ من وجهة نظره: "أي حد عنده عين هيشوف أن الكرة في أيد محمد علي بن رمضان، الكرة الأولى كمان مش الثانية".
وتساءل: "ليه متحسبهاش؟ ليه مترجعشي للفار حتى؟ هذا هو السؤال الذي يطرح نفسه بقوة".
واختتم تصريحاته: "احنا خلاص مش بنعترض، احنا باركنا للأهلي ولعيبته، بس أنا بقول ليه تخلي شكلنا وحش قدام الناس.. صعب انك تبقى خارج من الماتش وحاسس إنك مظلوم".
