إيناس عز الدين تحيي ذكري وفاة جدتها بكلمات مؤثرة

أعربت المطربة إيناس عز الدين، عن حزنها الشديد لفقدان جدتها، والتي تعتبرها والدتها، تزامنًا مع يوم ميلادها، كاشفة أن اليوم يجمعها بأولى جلسات المحمكة ضد والدتها الحقيقية.

وكتبت إيناس عز الدين، منشور عبر حسابها الرسمي على موقع “فيسبوك” قائلة: «النهاردة أول عيد ميلاد ليا يمر وإنتي مش في الدنيا يا ماما ديدا يا أمي اللي ما عرفتش في حياتي أم غيرها ياللي عوضتيني عن فقدان الأم والأب والدنيا بحالها طول حياتك وسترتيني انا وأختي وربيتينا أحسن تربية وإتكسر ضهرك علينا لآخر يوم في حياتك وضحيتي من أجل تربيتنا بكل ما هو نفيس وغالي وكل ما تملكي».

وأضافت: «بكرة سنويتك الأولى يا نور عيني وروح قلبي يا أعظم أم جت في الدنيا إنتي الأم اللي قررت تشيل شيلة مش بتاعتها ومش بس كده دي عاشت تحارب علشان تحمي الشيلة دي اللي هي انا واختي وتسترهم وشيلة انا على يقين إنك قابلتي ربنا بيها وهيكرمك عليها آخر كرم وصدقيني إنتي ما فارقتينيش ثانية عايشة ببركة دعائك وربنا بيرزقني وبيكرمني آخر كرم وفضل لأنك قابلتي وجه رب كريم ودعواتك ليا انا وأختي على لسانك».

وتابعت: «بس الدنيا جت علينا قوي يا ديدا من بعدك لدرجة إن أول عيد ميلاد ليا وإنتي مش في الدنيا انا مقضياه انا وأختي في المحكمة علشان أمي الحقيقية قررت تحتفل بعيد ميلادي بعد وفاتك احتفالية ضخمة وتبقى أول جلسة ليا قدامها النهاردة في المحكمة كل اللي عشتي تحميني منه انا وأختي وكنتي حائط دفاع وصد وبتاخديه لوحدك علشان تحمينا وياما سنين اتعمل فيكي وكنتي بتتحملي علشان تمنعي عننا الشر والأذى للأسف بيحصل فينا من بعدك بس برضوا انا قدها وقدود لآخر نفس علشان انا تربيتك وبنتك إنتي الست العظيمة القوية اللي علمتني أواجه الدنيا بحالها مادمت على حق».

واختتمت: «فضلًا وليس أمرًا هديتكم ليا في عيد ميلادي تكون دعوة للأم المثالية في نظري جدتي #ماما_ديدا بكره سنويتها الأولى، والصور دي أعظم هدية جتلي في عيد ميلادي من صديقي اللي ربنا يكرمه ويبارك في عمره مهما شكرتك مش هوفيك حقك كفاية دموعي وانا شايفة الصور الله يكرمك ويفرح قلبك».

أزمة إيناس عز الدين ووالدتها 

يذكر أن المطربة إيناس عز الدين، كانت قد تحدثت عن علاقتها بوالدتها، مؤكدة أنها كانت تضربها بشكل قاس، تسبب لها في أضرار جسيمة.

وأضافت إيناس عز الدين خلال تصريحات تلفزيونية ببرنامج «القاهرة اليوم»، مع الإعلامية مروة صبري: «والدتي كانت بتضربني بس مش زي أي أم.. مرة كسر دراع واتجبست يومين وكان هيعمل غرغرينة ويتقطع، خرم في راسي بكعب الشوز».

وتابعت: «والكلام ده كان بيحصل لحد ما كبرت ووصلت ثانوية عامة والجيران شاهدين كانوا بييجوا يشيلوها من عليا، من أول ما فتحت عنيا على الدنيا».

وفي سياق آخر، تحدثت المطربة إيناس عز الدين عن علاقتها بعائلتها، والخلافات التي بينها وبين والدتها، مؤكدة إن الأخيرة رفعت ضدها قضية شروع في قتل.

وأضافت: «والدي توفى من وأنا عندي خمس سنين، ووالدتي موجودة لكن أنا بالنسبة لي جدتي هي الأم لأن الأم هي اللي بتربي وبتفضل ولادها عن نفسها».

وتابعت: «طفولتي كانت قاسية لأني اتحرمت من حضن الأم وفراق الأب، وشفت قسوة ومعاملة سيئة وصلتني لـ أكون عندي أزمة نفسية مع نفسي، مش كل الأمهات عندها الحنان أو حب لولادها، كانت قاسية قسوة غير مبررة مافيش رحمة تجاهنا».

واستكملت إيناس عز الدين حديثها: «مازلت بحس بوحدة رغم أن جوزي بيحاول يقلل من الوحدة لكن مازلت، كانت علاقتي بيها بحاول أجملها ولأن جدتي حاولت تجمعنا، ولكن لما جدتي اتوفت من 3 شهور حسيت أني مليش حد، حاولت اقرب منها طول السنين اللي فاتت لكن لقيت بيتم استنزافي بشكل معنوي، ولقيتها مؤخرًا بتصرفاتها مش أم كانت عايز تمنعني أغسل جدتي».

وقالت إيناس عز الدين: «أمي رفعت عليا قضية شروع في قتل، أنا وأختي وجوزي وخالي، عشان رفضنا مننزلش ندفن جدتي، كنت ابنة بارة لآخر يوم، الإحساس بيها راح».