بعد تعرض نجليها للعقر.. الفنانة زينة تناشد الرئيس السيسي برسالة إنسانية
تعرض أبناء الفنانة زينة لهجوم من “كلب شرس”، خلال لعبهما كرة القدم دخل ملعب كرة قدم بإحدى كمبوندات بالشيخ زايد.
هجوم كلب على أبناء زينة
قالت الفنانة زينة خلال مداخلة هاتفية ببرنامج “الحكاية” والمذاع عبر قناة “ام بي سي مصر" للإعلامي عمرو أديب: "نزلت اولادي عند الملعب، كانوا لوحدهم بيلعبوا كورة في ملعب خاص بالكومبوند اللي ساكنين فيه، وسبتهم روحت للسوبر الماركت اللي على أول الشارع، لقيت تليفون جايلي ابني بيصوت وبيعيط، بيقولي الحقيني يا مامي الكلب سيبه عليا في الملعب، وعايز يعضني وأنا اتعورت".
بداية المشادة بين الأولاد
وتابعت: “في ولد بيقول لابني عاوز ألعب قاله ده الحجز بتاعي، الحجز لاتنين بس، تعالا نلعب مع بعض قاله لا دا أنا معايا قرايبي، عايزة العب معاهم، قاله لا ده حجزي انا مش هسيبلك حجزي، قاله طب هعرف اخرجك إزاي وساب الكلب عليه، طبعا واحد جيه يجري نط من السور المسمار عور دراعه الشمال والتاني الكلب هجم عليه وكان واقف ثابت هو عارف يعمل اي عشان عنده كلب، خربشة في رجله وجري الكلب وراهم، لقيتهم في مكتب الأمن، متخبين مقفول عليهم عشان خايفين، سالتهم مين اللي شاف الواقعة دي، وقالوا إن مشرف الأمن شاف الواقعة”.
وأوضحت: “روحت للمشرف عشان يفهمني، اي اللي حصل، لأن عادة ده مش بيحصل كل البيوت فيها كلاب وبتحترم نفسها، لقيت المشرف واقف وكان معاه موتوسيكل، قولتله فيه أي قالي هو دا الواد اللي ساب الكلب على أولاد حضرتك، قولتله انت مين أو ابن مين قالي البيت أهو، قولتله العيب مش عليك أنا عندي زيك وديني عند مامتك، وديني عند أمك، أي حد في الدنيا عنده كلاب مش بيخرج الكلب مع أولاد صغيرة”.
هجوم والدة الواد على زينة
واستكملت زينة: “الواد دخل البيت وكان معايا مشرف الأمن ولقيت واحدة طالعة بتشتم وانتي وانتي وتجاوزات، قولتلها جيالك علشان أقولك اللي حصل، انتي جايه تهجمي علينا في بيتنا، وانا برا البيت، وجوزها بيسكت فيها وهي مش عاوزه تسكت ومش عاملة حساب لحد، كان صوتها عالي والفاظ”.
وأشارت: “المهم طلبت النجدة ووزارة الداخلية ما اتاخرتش وبعتوا كل حاجة لما عرفوا إن الموضوع كلب، وانا مش هستنى لما تحصل لابني حاجة، احنا في دولة قانون وعملت البلاغ رئيس المباحث قالي هروح اجيب الواد والناس والكلب ونطلع على القسم”.
وأكدت زينة: “قولتله حاضر اتصلت على اخويا، وروحت القسم لقيت 3 رجاله واقفين أنا النائب محمد الجارحي وانا النائب حسام الجارحي وانا النائب كذا، قولتله ليه النائب قبل الاسم، أنا بقول زينة مش الفنانة زينة، قال دول ضيوف عندنا”.
التصالح بين الطرفين
وأضافت: “اعتذروا لابني وهما كانوا محترمين، قولتله تمام اكتبوا تعهد بأن ده مش هيحصل تاني، قالوا مش هيحصل ده تاني، وقولتلهم الواد يعتذر للولد عشان دي حاجة نفسيه، قالولي مش بنطلع ولادنا أقسام، الولد في العربية تحت، نبقى نخليه يعتذر تحت، وما اعرفش هو مين ولا ابن مين”.
عودة الخلف وتحوله لمحضر إداري
واستطرت: “سألته فين الست اللي شتمتني وجوزها اللي هما مسؤلين عن ان طفل يبقلا معاه كلب، طلبت اشوف بطايقهم، كأنه سر لا بطايق طلعت ولا عرفت مين الناس دول، الولد قالي مش قصدي، قلتله مسمهاش قصدي اسمها أنا أسف، اسنه زين، قاله أنا أسف يا زين، قلتله يا حبيبي انت واحد محترم، ده غير ان لقيت ناس كتيرة تحت تبعهم، الست نزلت من العربية اوعى يا آدم تعتذر، قولتلها هو اعتذر، اللي بيغلط بيعتذر، انتي مريضة نفسيا قالتلي يعتذر لمين، وانتي مين، وفجأة اتحول المحضر إداري، وقعدوا يقولوا مفيش كلب، وقالوا هنعمل فيكي محضر لو متنزلتيش”.
وتابعت: "النواب طلعوا ولاد عم وهي بنت عمهم ومتجوزة ابن عمهم وهما قرايب، واحنا في القسم لقيت إن وانا بقوله سيادة الرئيس مطلع قانون علشان الكلاب والأطفال قالي احنا اللى بنكتب القوانين، قولتله يعني بتعملوا القوانين دي علشان يطبق علينا كعامة الناس؟، ومش بتمشي على حضراتكم وحضرتك أول واحد هيتحاسب القانون».
موضحة: «عملولي محضر، اتهموني إني بجري بالعربية علشان ادوس الولد،على أساس إني مجنونة هدوس الولد وأنا عندي زيه، أنا بجري عشان الحق فرد الأمن عشان اسالة مين الولد ده، وروحت المستشفى عملت تقرير طبي للولدين وطلعلي كشف طبي».
وتابعت الفنانة زينة: «ازاي كلب ضخم زي ده وبالشكل الشرس فين مسؤلية الأب، لو كان قتل ابني أو هجم عليه، أنا عاوزه حق ابني وبطالب إن يكون فيه شفافية، احنا في دولة قانون ومتعودة دائما إني باخد حقي بالقانون وهاخد حق ابني بالقانون، يعني ابن محمد رمضان اتحول للتحقيق كلنا بنتحاسب، وبناشد السيد رئيس الجمهورية بإنه يضع حد للي معاهم فلوس وحصانة».
واختتمت الفنانة زينة: «الكلاب كائنات ملهاش مخ، انا مش همشي كلبي مع عيالي لوحدهمالعيال كان عندهم امتحان النهارده ما رحوش المدرسة، وعيالي دايما في الملعب والمدرس بيجلهم ومن ساعتها مش عارفين يناموا».
