مجدي الجلاد: سألت صفوت الشريف ليه بعض الأجهزة مش بيحبوني وقالي ده حقيقي لكن بيحترموك
كشف الكاتب الصحفي مجدي الجلاد عن موقف جمعه بالوزير الأسبق صفوت الشريف قائلًا: "في يوم السيد صفوت الشريف الله يرحمه كان احيانا يقولي مبتعديش تشرب معايا قهوة ليه، مش انا ابوك وابو الصحفيين، فا اعرف ان فيه حاجة، وابدأ ادور في المصايب اللي انا عملتها، و نتفق او نختلف هو كان سياسي عبقري".
وقال الكاتب الصحفي مجدي الجلاد، خلال تصريحات تليفزيونية: "في وسط الكلام، وقبل ما يطلب مني حاجة، قلتله عايز اسأل حضرتك سؤال، ليه بعض الأجهزة في مصر مش بتحبني، قالي اللي انت قلته حقيقي، مش بيحبوك لكن بيحترموك، قلت له الاحترام عندي هو الأهم، قالي انت بقيت مغرور، قلتله لا مش الحب ده في القلب والرسول صلى الله عليه وسلم قال لربنا القلب ده مش ملكي".
وتابع: "بالتالي مش هطلب المستحيل، لو مش بتحبوني لكن أقل حاجة الاحترام، وانا بحترم الناس وعايزها تحترمني، والواقعة دي هو حكاها لصديق عزيز أكبر مني، قاله مجدي جاوبني اجابة غريبة جدًا وقالي مش عايز حب وعايز احترام، هل ده غرور، فا صديقي رد عليه قاله، لأ طبعًا بس طبيعي مش هيجبر حد يحبه لكن هيحط حدود للتعامل".
