أمير مرتضى: مفيش حد بيحمي مرتضى منصور هو لو فيه حد بيحميه هيتحبس كل سنتين مرة
علق أمير مرتضى منصور، المشرف السابق على الكرة بنادي الزمالك، على غرور والده، قائلًا: "المستشار مرتضى منصور مش مغرور، ولو مشيتي في جامعة الدول بالليل هتلاقيه ماشي لوحده من غير سواق وبيشتري الجرايد بنفسه وبيدخل السوبر ماركت، واللي بيحميه ربنا، هو فيه واحد حد بيحميه هيتحبس كل سنتين مرة، في اخر 10 سنين اتحبس 4 مرات، لما بيبقى في الحبس بيبقى قوي جدًا، بروح له في كامل أناقته وطاقته وبيتعامل أنها استراحة محارب، زرته في سجون كتير زي المزرعة وطرة ووادي النطرون".
وقال أمير مرتضى، خلال تصريحات تليفزيونية: "والدي دايمًا بيتعامل انها محنة وبيقول دايمًا متقلقوش انا مظلوم ومش داخل في حاجة مخلة، وهو فعلًا مظلوم لان في واحد ضرب واحد على الهوا وطلع بعدها بيوم على الهوا عادي، زي مانا بيتقال عليا عندي كتائب الكترونية، هو انا لو عندي ده هيبقى فيه صفحات بتقول عليا بتاع عمولات ومخدرات، ده كان ناقص يتقال عليا بوأد بنات أو المسيخ الدجال مثلًا، ومعنديش غرور بس بتجيلي لحظة سيطرة، بقى عندي وعي بالمرحلة الي انا فيها، وبخلي بالي من كل قرار، وكان عندي مشكلة اني بعد 10 سنين اشوف نفسي في انترفيو ماندمش".
