خالد الغندور يفتح النار على قناة الأهلي: "متقدروش تهاجموا الخطيب"
شن الإعلامي خالد الغندور هجوماً عنيفاً على قناة الأهلي وذلك بعد الهزيمة الثقيلة التي تعرض لها الأهلي أمام صن داونز الجنوب إفريقي بنتيجة 2 - 5 في المباراة التي جمعتهما في جنوب إفريقيا، ضمن منافسات الجولة الرابعة لدور المجموعات في دوري أبطال إفريقيا.
خالد الغندور يفتح النار على قناة الأهلي: "متقدروش تهاجموا الخطيب"
وقال خالد الغندور في تصريحات تلفزيونية، "بعض مقدمي البرامج في قناة الأهلي والصحفيين اللي شغالين في المنظومة الاعلامية بالنادي الأهلي، كانوا بيقولوا خالد الغندور بيطبل لمرتضى منصور والصحفيين اللي معاه بيطبلوا لمرتضى منصور، وكانوا بيقولوا علينا هزازي الرؤوس".
وأضاف خالد الغندور: "بعد هزيمة الأهلي بخماسية أمام صن داونز عاوزيين نشوف الإعلاميين في قناة الأهلي المهندس عدلي القيعي وإبراهيم المنيسي وأيمن شوقي وإسلام الشاطر ومحمد فارس اللي فاكر نفسه حامي الحمى على السوشيال ميديا، أكيد دمهم محروق وحان الوقت انهم يهاجموا محمود الخطيب، مش معقولة يمدحوا فيه مش معقولة بعد هذه النتيجة هيشيلوا حد الليلة".
واستكمل خالد الغندور تصريحاته قائلاً، "اللي شغالين في قناة الأهلي شيلوا الليلة إلى مارسيل كولر المدير الفني للفريق الكروي الأول بالنادي الأهلي، مفيش حد في قناة الأهلي يقدر يهاجم الخطيب ومجلس إدارته، ده بيقولوا اللي بيهاجموا الخطيب، ومجلس الإدارة بيكرهوا النادي، في نفس الوقت احنا في قناة الزمالك لما بندافع عن مجلس الإدارة، بيقولوا علينا بنطبل".
كما رد خالد الغندور على الحملات التي يتعرض لها لاعبي الفريق الكروي الأول بنادي الزمالك من جانب بعض جماهير القلعة البيضاء وعلى رأسهم مصطفى شلبي.
وقال خالد الغندور، "أنا كلاعب سابق للزمالك ممكن ما اكون مش راضى على بعض الصفقات، ومش مقتنع بعدد منهم وشايفهم مش قد نادى الزمالك، لكن فى لاعب متاثر بالهجوم عليه وفى محاولات لافشال بعض الصفقات ونشر عقودهم للضغط عليهم، فى لاعب يستحمل ولاعب ميستحملش، أكبر دليل مثلاً مصطفى شلبى لاعب مميز وسريع وعنده مهاره، وحتى الان لم يظهر بمستوى مقنع للجمهور، ومع الوقت الضغوط هتتشال وهيظهر مستواه".
وأضاف خالد الغندور، "مصطفى شلبي، لو جاب جول واحد بس الامور هتتغير بالنسبة له، ونفس الحال نبيل دونجا اللى الزمالك حاول كثير قبل كدا يتعاقد معاه، لانه لاعب مميز، يبقى نسأل السؤال هو مميز وعند امكانيات ولا لا؟ ايوه عنده وطارق حامد لما جه من سموحه لو تفتكروا كان بيقعد احتياطى وخطوة خطة بقى نجم الفريق".
واختتم خالد الغندور تصريحاته قائلاً، "دونجا أول ما جه الزمالك اتصاب وهو مع المنتخب، ومع الوقت هيتحسن لما الفريق يفوق يا جماعة فى محاولة واضحة لاسقاط الزمالك، هو فيه نادى فى مصر بيتسرب عقود لاعبيه الا الزمالك".
