حفيدة الفنانة زوزو نبيل: "أخدت منها إحساس الحب"
الثلاثاء 05/أبريل/2022 - 03:37 م
قالت هالة حفيدة الفنانة زوزو نبيل ان زوزو نبيل ما كانتش حما خالص وكانت فرحانة أوى إنى أول حفيدة وما قالتش لأبويا يسميني على اسمها، و كانت بتحب اللى حواليها اوى، و كانت عايشة مع الزوجة الأولى الحاجة فاطمة، و لما كان حد يكلم ماما زوزو في أي أوردر، الحاجة فاطمة كانت تقولهم أنا أختها الكبيرة، جاء ذلك خلال حوارها لبرنامج "عيلتي وأفتخر" الذي يذاع علي شعبي اف ام والبرنامج من تقديم حازم قابيل.
وأضافت ابويا لم يُستشهد فى حرب أكتوبر زى ما بيتقال أبويا توفى بعد الحرب بسنتين، ولقب شهيد ده كبير أوى وكان يشرفنى إن ابويا يبقى شهيد بس أنا مقدرش آخد لقب مش بتاعنا.
وتابعت ماما زوزو كانت بتحب جوزى جدا و كان بالنسبة لها بدل ابويا، ومن كتر ما جوزى طيب حست انه ابنها، و عيلة ماما زوزو مشهورة بالبيت الكبير، بيت العيلة، انا اخدت من ماما زوزو إحساس الحب اللى الواحد بيحس بيه و الانبساط لما واحد بيبسط حد لان هى ديه كانت حياتها.
واختتمت قائلة اقول للعيلة إنتوا اسعدتونى طول عمركوا ودلعتوني، وعلى طول كنتوا معايا وجنبى ودي السمة اللى عندنا الحمد لله، و لو ماما زوزو سمعانى دلوقتى اقولها وحشتينى اوى اوى يا ماما زوزو.
