"هما اللي عملوا فيا كدة".. شقيقة "فتاة الشرقية المنتحرة" تكشف آخر كلماتها

نشرت صفحة "قاوم"، رسالة من شقيقة الطفلة هايدي صاحبة الـ15 عامًا والتي فارقت الحياة إثر تناولها حبة الغلة السامة، وأصبحت معروفة إعلاميًا بـ"فتاة الشرقية".

وقالت شقيقة الفتاة "هايدي"، وفقا لما نشرته صفحة "قاوم" بموقع التواصل الاجتماعي "فيس بوك": "قصة "هايدي" اختي الله يرحمها زي قصة "بسنت" بنت الغربية اللي انتحرت من فترة.. بس الفرق إن "بسنت" اتنين بس اللي اتفقوا عليها لكن أختي اتفق عليها مجموعة سفاحين بسبب مشاكل جيران.. "غندورة" اللي اول ما شافت هايدي بتموت قعدت تضحك وتزغرط وتتريق عليها وبناتها وابن خالتهم.. كنا جيران وأهل وواكلين ف بيتنا ومربيين عيالهم ووالدتي مكانتش بتتأخر عليهم بأي مساعدات مادية أو إنسانية ولا كنا بنتأخر عليهم في حاجة".

وتابعت: "مكناش نعرف إن الضربة يوم ما تيجي هتيجي منهم اتفقوا عليها وفبركولها صور وابتزونا ونفذنا كل طلباتهم وجينا نعمل محضر ابتزاز وتشهير ف صان قالوا لازم "أدلة"وساعتها مكنش معانا أي حاجه تثبت صِحة كلامنا لحد م الموضوع اتعرف وساعتها كنت جمعت كل حاجه تدين كل سفاح فيهم بس فات الأوان، اختي راحت مننا، حرقوا قلوبنا عليها بدري، امبارح كانت ف حضني والنهارده هتبقى ف المقابر، محدش مصدق اللي حصل والله هما قالولي هي كويسه بس كانوا بيصبروني أنا ووالدتي وقعدنا 14 ساعه ف النيابه والمركز وقدمنا بلاغ وكانوا هربانين بس اتجابوا ودلوقتي مستنيين الحُكم ومستنيين أختي ترجع ع الدفنة".

وأضافت: "كانت بتصلي وعارفة ربنا وعمرها ما أذت حد ودايما كانت جدعه وبتقف مع أي حد في أي مشكلة مكنش في اجدع ولا أحن من اختي والله وللعلم هي مكانش معاها موبايل علشان الناس اللي بتفتي وبتقول بسبب الموبايل.. أختي وهي بتموت كانت بتقول هما اللي عملوا فيا كده هما السبب ف اللي أنا فيه.. أنا مكنتش عايزة أموت بالطريقه دي بس هما مسابوليش فرصه اعيش ثانية في سلام من العيد الكبير اللي فات.. هو ده كل اللي حصل وحسبي الله ونعم الوكيل ف أي حد يطلع إشاعة عليها او يقول حاجه مش فيها".