لميس الحديدي لحاملي بطاقات التموين من غير المستحقين: إنتوا بترتكبوا جريمة
السبت 16/أكتوبر/2021 - 11:05 م
وجهت الإعلامية لميس الحديدي رسالة لأصحاب بطاقات التموين من غير المستحقين للدعم قائلة: "عاوزة أقولهم إن إللي بتعملوه ده تسبب في حجب الدعم عن المستحقين وهم بالملايين".
تابعت خلال برنامجها "كلمة أخيرة" المذاع على شاشة "ON": "فيه ناس كتيرة محتاجة ومش عارفة تقيد المواليد الجدد وهم من المستحقين لأن جهود التموين مستمرة في تنقيح بطاقات التموين".
وجهت رسالة لغير المستحقين قائلة: "لو عندك بطاقة تموين وانت خلاص مش محتاجها مخليها ليه؟ ما تروح تبلغ وتقول ياجماعة أنا مش مستحق للدعم! علشان واحد تاني وملايين محتاجين لها".
أكملت: "ده إحساس أنانية محتاج يتعالج ويواجه مش أبو بلاش وخلاص سواء عيش وغيره"، وكشفت أنها لمست بنفسها هذه الظاهرة في طبقة لا تستحق للدعم قائلة: "فيه ناس مكملة وواخدة البطاقات بأنانية ويقلك بوزعها على الغلابة إللي حواليا.. على فكرة ده حرام.. لو فاكر إنك بتوزعه ثواب ده حرام وده قولا واحدا".
أتمت: "أنت كده بتاخد حق شخص تاني وبتغل يد الدولة في منح هذا الدعم للمستحقين خاصة المواليد الجدد.. كل ده محتاجين نعالجه في أنفسنا قبل أن نتحدث عن الدولة".
