"بيعمل نفسه بيتكلم فى التليفون".. متحرش طليق بشوارع الدقهلية (فيديو)
الثلاثاء 01/يونيو/2021 - 01:04 م
روت طالبة تدعى "منة"، تفاصيل تعرضها للتحرش على يد أحد الأشخاص بمنطقة المنزلة فى الدقهلية، ونشرت عدة مقاطع فيديو وثقتها كاميرات المراقبة بشارع المدرسة الثانوية فى المنزلة.
ويظهر فى مقاطع الفيديو، رجل خمسيني مرتديًا "كاب" وكمامة، وينتظر بشارع المدرسة الثانوية بالمنزلة ممسكًا بهاتفه، وحال مرور أي فتاة أو مجموعة فتيات أمامه يقترب منهن ويتحرش بهن لفظيًا بأبشع الألفاظ.
وكشفت الشابة، عبر حسابها الشخصى على موقع "فيس بوك" تفاصيل الواقعة قائلة: "يوم 25 مايو "ذكر" حوالى 50 سنة ماشى فى شارع المدرسة الثانوية مش سايب بنت فى حالها كل ما واحدة تعدى من جمبه يرفع تليفونه كأنه بيتكلم ويفصص فى جسمها بأقذر الألفاظ".
وتابعت: "من ساعة اليوم ده وأنا بلف على كاميرات المحلات عشان أجيبك لأنى حطيتك فى دماغى وطلعت فى الأخر لابس كاب وكمامة ما أنت نازل من بيتك حاطط هدف قدامك بس أكيد لك أخ أخت ابن بنت صحاب أو حتى جيران هيعرفوك والغرض أنك تتفضح وميبقاش حد طايق يبص فى وشك".
وأضافت ضحية المتحرش: "أنا نفسى أعرف حاجة واحدة أنت هتحط عينك فى عين حد من دول إزاى بعد ما تتعرف!.. أنا وواحدة صاحبتى بنتكلم عن مواقف زى ديه قالتلى أنها اتعرضت لحاجة زى ديه قبل كدا ومن ساعتها بتخاف تمشى جمب أى راجل".
وأتمت: "أنا واحدة اتعرضت لحاجة زى دي من سنة ونص والمدة دي كلها الموضوع مأزمنى نفسيًا.. الناس بتصحى تقول صباح الخير وأنت صاحى تقول يا ترى هتحرش بكام واحدة انهاردة!.. شخص مريض وجاى يطلع مرضه ده علينا.. اتقى الله فى نفسك و فينا وفى عيالك وفى أهل بيتك".
