تفاصيل مشادة أحمد السقا و تامر حسني (صور)
السبت 10/أكتوبر/2020 - 11:15 م
كشف الفنان أحمد السقا خلال حلقته مع وفاء الكلاني في برنامج "السيرة"، غضبه من الفنان تامر حسني بسبب فيلم "الفلوس"، وكان سبب غضب الفنان السقا بسبب تواجد أسمه في دعاية فيلم الفلوس وهو ظهر كضيف شرف فقط.
وجاء رد الفنان تامر حسني على موقع التواصل الاجتماعي" إنستجرام" يدافع عن نفسه أمام جماهيره.
وقال تامر: "حبيبي وأخويا وصديق العمر ونجم الدنيا كلها أحمد السقا، كنت أتمنى أنك تكلمني بيني وبينك لو كنت زعلان من أي حاجة أو فاهم أي حاجة غلط، لأن الحاجات دي لا يمكن تفوتك وأنا كنت أتمنى مكتبش الكلام دا هنا بس علشان بعد كلامك في التليفزيون الجمهور الكريم بقى ليه حق أنه يفهم الصح".
وتابع : "علشان أفكرك بس، أنت كلمتني وقولتلي في خبر في موقع وعليه صورة افتراضية للفيلم وكاتبين إني بطل في الفيلم وأنا رديت عليك أن دي اجتهادات صحفية والصورة من تصميم المحبين اللي أكيد فرحوا بالخبر أننا مع بعض، حتى مقولتش أن دي الشركة المنتجة لأنها شركة كبيرة ولا يمكن تعمل كده لأن الفيلم متباع للخارج والداخل باسم أخوك تامر حسني، وأصلا أفيش الفيلم الرسمي نزل والناس كلها شافته وأنت مش فيه ولا فيه اسمك وكل الأبطال طالعين مرسومين معرفش زعلك من إيه الحقيقة، كان ممكن تزعل لو الكلام دا نزل على صفحتي".
واستطرد: "وأنا شرحتلك ده من سنة واتكلمنا بعدها مرتين مرة عيدت عليك في عيد ميلادك والتانية بخصوص برنامجك لو كنت لسه زعلان كنت هتقولي ساعتها، الفيلم بقاله سنة يا أحمد.
وأضاف: "أخيرا بقى مستحيل الشركة تروج وأنا أفوت أو اسمح باستخدام اسمك كبطل في الفيلم وأنت مش فيه لأن دا هيعود علينا كلنا بالضرر لأن الناس هتدخل الفيلم مش هيلاقوا الكلام دا فهيبقى احنا كده بنضحك على الناس وضرينا الفيلم ولأن أكيد يشرفني أن احنا نمثل مع بعض بطولة مشتركة لأنك حبيبي بجد ونجم أنا بحبه من قلبي فعلا، وبعدين يا حج أحمد لما أنا جيتلك مسلسلك حصل اجتهادات كتير من محبينك الكرام شوية يقولوا المسلسل بطولتنا وشوية يقولوا دا ضيف شرف بس وأنت عارف أن عمري ما عملتها وطلعت ضيف شرف غير ليك".
وتابع : "دا أنت طلبتني أجي اصور الساعة 8 الصبح كنت عندك في نص ساعة علشان فكرة طلعت في دماغك فجأة وجيت لأنك غالي عندي أوي أوي فوق ما تتصور، وكنت بفرح باجتهادات محبينك ومحبيني حتى لو صورتي صغيرة أو كاتبين بطولة أو ضيف شرف كل دا مش فارق لأني جيت أخدم صديق عمري وأتمنى أي كلام يصب في مصلحة مسلسل أخويا وينجح ويكسر الدنيا".
اختتم كلامه: "أنت حبيبي يا أحمد وصديق عمر علشان كدا أنا اللي مش هزعل منك معلش طولت في الكلام لأن برضو زعلك يعز عليا".
