"اللي بيختار غلط سكوته يدمره".. مؤلف اللى مالوش كبير يكشف سبب موت أحمد العوضى بنهاية المسلسل
كشف الفنان عمرو محمود ياسين ، مؤلف مسلسل " اللى مالوش كبير" عن سبب اختيارة موت عدد من أبطال مسلسله ومنهم الفنان أحمد العوضى بشخصية " سيف الخديوى" بأن الاختيارات الخطأ والاستمرار فى الخطأ يدمر حياة الإنسان .
وقال عمرو محمود ياسين عبر صفحته الشخصية على "
فيس بوك" ،" وقت ما كنت بكلم صديقي واخي ايمن بهجت قمر عن الأفكار اللي في المسلسل عشان يكتب التتر بتاعه اللي
بحييه عليه جدا ..قلت له
ان من ضمن الافكار اللي عايز
التتر يتكلم فيها. فكرة ان اللي بيختار غلط و يفضل متمسك بغلطه و مستسهله حياته بتبوظ .. فكتب الجمله الجميله دي بالاغنية .."واللي بيختار غلط سكوته يدمره ".
وتابع"يعني اللي بيختار سكة مش تمام و ما يحاولش
يغير فكره بالوقت المناسب حياته هتدمر ..فييجي بعض الناس عايزين يغيرولي احد
الأفكار الرئيسيه في المسلسل و
يخلوني اتكلم عن التوبه ..ويقولوا لي كنت خليه
يتوب .. طيب ماهو انا في العمل ده عايز اتكلم عن الناس اللي مش بتوب ! ..انا بناقش فكرة
استسهال الخطأ و الثبات عليه و اثره ع الإنسان و ع المحطيين به ."
واستطرد "بعمل شكل من أشكال الزجر لكل من تسول له
نفسه انه يمارس البلطجة و الإجرام ..و
بوريله انه ممكن يخسر كل شيء. زي ما الخديوي خسر اخوه و خسر صديق عمره وخسر الجنين اللي كان في بطن زوجته ..وخسر حياته
اللي كان متمنيها مع الزوجه اللي حبها ..وفي الاخر خسر حياته شخصيا.. هتقولي طب خلتنا نحبه ليه .. خليتك تحبه لانك لو محبتوش انت مش هتكمل
المسلسل اصلا ثم ان انت حبيت فيه لحظاته المميزه
مع الناس اللي بيحبها اخوه صحبه..
حبيبته.. ولاده ..طبيعي هيبقي كويس معاهم
!!".
وقال "لكن انا ماخبتش عليك انه بلطجي ! من اول
لحظه وانت عارف انه راجل مفتري و خارج ع
القانون..من الحلقات الاولي و انت شفته. رايح يتفق على قتل انسان مايعرفوش
مقابل المال ..يعني هو قاتل مأجور!!..
السيناريو لم يخدعك وقالك كل الحقائق من بدري .. طيب
انت اخترت تحبه .. بس ده لا يعفيه من
المسؤوليه
واختتم حديثه قائلاً" انا لما موت مالك و موت
مينا و موت الخديوي ماعملتش ده عشان انكد عليك .. لكن عشان أؤكد ع فكره معينه عايز
اوصلها للمتلقي .. هي ان اللي يختار غلط
سكوته يدمره!".
