مي عمر: كنت بغير من أحمد زويل وكان نفسى أبقى زيه وأنا صغيرة
الجمعة 07/مايو/2021 - 09:10 م
قالت الفنانة مي عمر، إن التردد أكبر مشكلة تواجهها وتسبب لها مشكلات كثيرة في حياتها، موضحة: «التردد ممكن يعطل نجاح أي شخص، بيخليني مش عارف أتخذ قرارات صح ولا غلط، وممكن أضيع فرص حلوة بسبب التردد».
وحول ما إذا كانت تشعر بالغيرة أضافت «عمر»، خلال حوارها مع الإعلامية بسمة وهبة، مقدمة برنامج «العرافة» الذي يعرض عبر شاشة «المحور»: "الغيرة شعور إنساني، بغير ممكن من حد عمل حاجة انا معملتهاش ونجاح أنا منجحتهوش، غنجاز معين أنا لسه متأخرة عليه".
وتابعت: «كنت بغير ونفسي أبقى زي أحمد زويل وأنا صغيرة في المدرسة، مكنش نفسي أبقى عالمة، كان نفسي أحصل على جائزة عالمية زيه، وكان نفسي أحقق حاجات محدش حققها، كنا بندرسه وعرفنا إنه كان بينام قليل جدا، وبينام في اليوم 4 ساعات، وقلت همرن نفسي إني هنام 4 ساعات، وكنت بذاكر جامد جدا ودحيحة وكنت جايبة 96.5% في الثانوية العامة، وكنت كل يوم بقلل ساعات نومي عشان أوصل لـ4 ساعات، ومعرفتش أوصل لهم».
وعلقت الفنانة مي عمر، على اتهامها بأنها نجحت في عالم الفن في الواسطة، لأن زوجها هو المخرج محمد سامي، قائلة، إنها بعدما شاركت في مسلسلها الأول «الأسطورة» مع زوجها، قدمت مسلسل عفاريت عدلي علام، وأوضحت: «وده مكنش بواسطة، وكنت عاملة مشاهد حب معاه أبيض وأسود جرافكيس، وفي نفس السنة قدمت ريح المدام».
وأضافت "عمر": "الرد لازم يبقى بالأعمال، والاتهامات بالواسطة بتاخد وقتها، ولما الناس تشوف تاريخ بعد 10 سنين هيبصوا على الأدوار، وفي الآخر مش بيهمني اشتغلت بواسطة ولا لأ، أو مع جوزي او مش معاه، بس المهم جودة الدور".
وتابعت، أنها قدمت فيلم آخر ديك في مصر مع النجم محمد رمضان: «بعمل حاجات كتير جدا بره، ولما أرجع أشتغل مع محمد يقولوا واسطة، وفي الآخر الناس اللي في الشارع مش بيقولوا الكلام ده ولا بيشوفوا ده».
