شقيقه ضحية الوراق لـ"مصر تايمز": كان بيضربها ويحبسها لحد ما ماتت

كشفت "راندا" شقيقة "مروة" ضحية العنف فى الوراق التابعة لمنطقة الجيزة، تفاصيل جديدة حول قيام زوج بضرب زوجته وأنتهت بتسديده لها عدة 20 طعنة حتى توفت فى الحال.

وقالت "راندا" شقيقة الفتاة فى تصريح لـ"مصر تايمز"، أن أهل زوج شقيقتها معروفين أنهم وحشين وأهله وحشين ومعرفناش ألا أما اتجوزها، أختى ماتت وهى لسه مكلمتش 24 سنة حتى وقال أنها بتخونه وده محصلش وهى عمرها معملت حاجة غلط كان بيضربها ويحبسها باليومين ويهددها ويهدد أهله محدش يفتحلها وطلقها حوالى 4 مرات وبترجع عشان عيالها ويضربها ويموتها يضرب بنته عندها سنتين وكان بيكتم نفسها بالمخده".

وتابعت: "كان بيضرب أمى "حماته" واختى متهنتش معاه يوم واحد وهو أهله وحشين وميعرفوش ربنا وحتى مبيصرفوش عليها ولاعارفه تأكل عيالها طعنها أكتر من 20 طعنه".

وأضافت: "طلق اختى وراح اتجوز عليها وبعدين طلق الست دى وهى مخلفه منه بنت ميعرفش شكلها حتى وخدت كل حقوقها لكن مروة أختى غلبانة وبلغنا عنه قبل كدا الحكومة لأنه بيتهجم علينا وأخواته جم هدوونا عشان نخرجه وخرجناه والحكومة عارفه ده، كان بيشتم أبويا وامى ماتت بسبب الزعل جالها حلطة فى المخ بسببه وأخر مره رجعتله جابها ميته وجسمها كله طعن كانت بتجيلنا وشها وجسمها كله متقطع ومتشوه وننزل المستشفى نخيطها.

وقالت: "أختى عندها 4 عيال ومش عارفه تاكل ولا تأكلهم وعشان كدا رجعتله ومكناش نعرف انها لما ترجع هيموتها وراح يقول لوكيل النيابة أنها كانت بتكلم واحد وبعد فحص وكيل النيابة قال مافيش صحة للكلام وقتلها وهى صايمة، جالى تليفون الصبح اخواته قالولى تعالى اختك عيانة لما روحنا لقينا عزا وهدومها مليانه دم وروحنا المشرحة حتى مشوفنهاش وقالولنا الناس فى المنطقة دى ماتت من الصبح بدرى".

مضيفة: " ولما وكيل النيابة سأل ابن أختى "مروة"، عن الـ شافه  قاله "انا شوفت بابا مسك سكينه وضرب ماما وانا مش عارف اى ده".

وعند مواجهته فى النيابة  اعترف ومثل الجريمة ولما شافنا فى فضل يسب بألفاظ بذيئة ولا كأنه عمل حاجه وأما أخواته بلغوا عنه عشان يخلوا مسؤليتهم".

وقررت النيابة العامة بشمال الجيزة، حبس "إبراهيم.ض"، قاتل زوجته 4 أيام على ذمة التحقيقات، وطالبت بسرعة التحريات حول الواقعة، وانتداب الطب الشرعي لتشريح جثة المجنى عليها، وصرحت بدفن الجثة عقب بيان الصفة التشريحية.

البداية بتلقى الإدارة العامة لمباحث الجيزة بلاغا من شرطة النجدة، بعثور الـأهالي على جثة ربة منزل، 24 عامًا داخل منزلها بمنطقة الوراق، وعلى الفور انتقلت الأجهزة الأمنية إلى مكان البلاغ وتم الاستماع إلى أقوال شهود عيان وأقارب المجني عليها.

وكشفت التحريات مباحث الجيزة أن "إبراهيم.ض"، زوج المجني عليها، قهوجي 37 سنة، وراء قتل المجني عليها بعد أن سدد في جسدها 20 طعنة، وتم القبض عليه وبمواجهته اعترف بارتكاب الواقعة وأرشد عن السلاح المستخدم (سكين).