الخميس 28 مارس 2024 الموافق 18 رمضان 1445
رئيس التحرير
حازم عادل
سوشيال

صاحبة هاشتاج "يوميات خ م" تكشف تفاصيل وقوعها ضحية لطبيب المنصورة: "اتاخدت غدر"

الخميس 08/أبريل/2021 - 03:18 م
مصر تايمز

كشفت رهف تاج الدين الفتاة صاحبة هاشتاج "يوميات خ م" والتي تحدثت من خلاله عن طبيب المنصورة الذي استغل عدد من الفتيات للإيقاع بحبه، بدون علم زوجته، تفاصيل وقوعها ضحية للطبيب المخادع، معبرة عن حزنها الشديد لأنها كانت تثق به وبتصرفاته.

وكتبت رهف عبر صفحتها الرسمية بموقع "فيس بوك": "البوست الأخير ليا هنا بخصوص الموضوع، وهاخد أجازة من هنا علشان الموضوع بقى صعب عليا وضاغطني بشكل لا يحتمل، جايز يكون اللي حواليا وغضبانين علشاني مبسوطين بالتريند علشان يكون الموضوع عبرة وتوعية، وأنا المفروض أكون قوية وأنا هكون قوية وهعدي الأزمة بس محتاجة أرتاح وأبعد عن الضغط ده".

وأضافت: "أنا مش عايزة فولورز ولا عايزة أطلع في برامج ولا أكتب تصريحات لجرايد، أنا مش عايزة غير إني أقول لكل بنت ما تغرقش بكل مشاعرها، وتاخد بالها من علامات كتير ما تبانش طبيعية، زي إنه مش عايز يعمل engaged ليكي على الفيسبوك رغم خطوبتكم الرسمية ويفضل سينجل! مهما كان الشخص جميل ومؤدب ومحترم وبيحبك وبيحترمك، ما تديش الأمان الكامل علشان ده اللي خلاني أقع فريسة سهلة لتصديق كل كدبة منه، بالعكس أنا لو كانت عندي شكوك مسبقة كانت الصدمة هتكون أهوّن"

وتابعت:" لازم تسألوا كويس عن الشخص وتعرفوا كل الحقايق مش بس اللي بيقولها عن نفسه.. تقلقي لو اللي مرتبطة بيه كل شوية يقولك معرفش مين عايزة تقرب مني ومين بتجيبلي هدايا وفلانة بعتالي إيه حتى شوفي الاسكرين".

وأستكملت: "أنا ما شوفتش أي حاجة وحشة بالعكس كان شخص داعم جدًا وواقف معايا وورايا في كل خطوة باخدها تخصني وتخص كاريري، أنا اتكتب كتابي وكنت فرحانة بكل تفاصيله ولسه الناس بتباركلي وأنام وأصحى على إن أبويا كشف ببطاقته في السجل المدني بعد ما وصله كلام وفعلًا لقي قسيمته! تخيلوا كنت ماسكة القسيمة في إيدي وما شكتش فيه بالعكس قلت دي أكيد مؤامرة عليه، وفضل يومين من بعدها يكدب عليا ويسرح بيا وإنه ميعرفش طلعت إزاي، ووسط ما كل أهلي قاعدين يتهموه كنت واقفة بدافع عنه قدامهم.. ويوصل لأخويا كل الأدلة من واحدة تالتة مرتبط بيها وبالفعل راح اتقدملها، ومكنتش قادرة أشوف ولا أسمع، وأخويا بنفسه يتأكد من جوازه وشقته وأنه عمل فرح كامل وكل ده محدش يعرف عنه حاجة لا أهله ولا أصحابه وأنا الوحيدة اللي علاقتي بيه معلنة.. كمية تفاصيل في الكدب علينا إحنا التلاتة، مراته وأنا والبنت التالتة تخلي أي دماغ تشيط".


وقالت: "واللي فضح الدنيا إني معروفة إلى حد ما بسبب شغل الميكاب فالبنت التالتة وصلتلي وبعتت لكل إخواتي ومن هنا انكشف كل حاجة وجوازته اتعرفت بسبب خبر كتب كتابي اللي بابا كتبه عنده فأصحاب الشقة اللي متجوز فيها أصلا صحاب بابا وعرفوه واتأكدنا من السجل المدني وان القسيمة طالعة بعد شهر من خطوبتي! أنا اتاخدت غدر، وكل أحلامي اللي حلمتها معاه في ليلة واحدة بقت كدبة والمفروض أفوق منها".

واختتمت حديثها: " لسه مش مستوعبة إن الشخص اللي بحبه هو ده، لسه مش مستوعبة حاجة لأنه كان رائع في كل حاجة، أو يمكن النسخة اللي كانت معايا هي اللي كانت كده.. ادعولي وخروجني من كل اللي بيحصل، أنا اللي ماسكة كل صحابي وأهلي أنهم ينزلوا صوره واسمه كامل لأني مش عايزة ده، كفاية ان الفكرة توصل وإن الكداب مسيره هيتكشف مهما خبّى..انا هقفل ومش هقدر أرد على رسايل أو تلفونات وأتمنى أرجع ألاقي بروفايلي الهادي وأدعولي ألاقي السلام والأمان تاني بعد ما فقدت الثقة في كل حاجة".

انتشرت مؤخرًا عبر مواقع التواصل الاجتماعي، قصة عن طبيب متزوج، من منطقة بلدة المنصورة، استغل عدد من الفتيات للإيقاع بحبه، بدون علم زوجته، حيث تصدر هاشتاج "يوميات خ م" موقع التغريدات القصيرة "تويتر" لفضح الدكتور المخادع.