أحمد المالكي يكشف لـ«مصر تايمز» كواليس «اتحامى فيا»: «دمجنا فكرتين وألبوم تامر حسني جمعنا مجددًا»

كشف الشاعر أحمد المالكي تفاصيل أغنية "اتحامى فيا"، إحدى أغنيات ألبوم تامر حسني الجديد "مش هتتكرر"، موضحًا أن فكرة الأغنية تعود إلى عام 2021، قبل أن ترى النور في الألبوم الحالي.

أحمد المالكي : أغنية "اتحامى فيا" من ألبوم "مش هتتكرر" 

وفي تصريح خاص لـ مصر تايمز، قال المالكي: "أغنية (اتحامى فيا) كتبت سنة 2021، وقتها تامر بعتلي اللحن وقالي اكتب عليه، وفعلاً كتبت الجزء الخاص بـ(اتحامى فيا).

بعدها الأغنية تأجلت فترة طويلة، وكل شوية كان يقولي هتنزل قريب، لحد ما كلمني وقال لي: عندك مشكلة ندمج أغنيتين مع بعض؟ فالكوبليهات كانت من عنده، بينما جزء (اتحامى فيا.. من الدنيا دي) كان من عندي، وفي النهاية الأغنية خرجت بشكل جديد من خلال دمج فكرتين في أغنية واحدة."

وأضاف: "لما بيجيلي لحن، هو اللي بيوجهني في الكتابة، ساعات بحسه حزين أو مبهج أو رومانسي، ولما سمعت لحن (اتحامى فيا) حسيت إنه رومانسي، فالكلمات خرجت بالشكل ده."

وعن تعاونه مع الملحن محمد يحيى، قال: "أنا ومحمد يحيى عملنا نجاحات كتيرة مع بعض، منها (حلو المكان) لتامر حسني، و(مصباح علاء الدين) لمحمد رمضان، و(يا روقانك) لعمرو دياب، والحمد لله بينا كيمياء حلوة جدًا."

كما أشاد بالموزع الموسيقي أحمد عبدالسلام، قائلًا: "الأغنية كان معمول لها توزيع مختلف في البداية، لكن تامر أسندها لأحمد عبدالسلام، وهو عمل مزيكا حلوة جدًا وأضاف لها بشكل كبير."

واختتم المالكي حديثه قائلًا: "كان عندي مع تامر في الألبوم 3 أو 4 أغاني، لكنه قرر ينزل (اتحامى فيا) السنة دي.

وتامر أول فنان بدأت معاه من أيام أغنية (ارتاح) سنة 2011، وبعدها رجعنا نتعاون تاني في (بعيون)، والحمد لله بينا نجاحات مستمرة، وتقريبًا كل ألبوم ببقى موجود معاه ومبغيبش عنه كتير."