أحمد أمين يدعم حق الأداء العلني: حماية حقوق المبدعين لا تتعارض مع الاستثمار

علق الفنان أحمد أمين على الجدل الدائر خلال الفترة الأخيرة بشأن حق الأداء العلني، في ظل الخلاف القائم بين غرفة صناعة السينما والنقابات الفنية، معربًا عن دعمه لتفعيل هذا الحق، ومؤكدًا أهميته في حفظ حقوق المبدعين.

أحمد أمين يدعم حق الأداء العلني

ونشر أحمد أمين رسالة عبر حسابه الرسمي على موقع "فيسبوك"، كتب فيها: "كلام كتير بيدور عن حق الأداء العلني اليومين دول ومصدعينكم أنا عارف.. ناس كتير هتقول واحنا مالنا فحبيت أحكيلكم الموضوع ببساطة".

وأضاف: "أي أغنية قديمة بتسمعها أو فيلم أو عمل فني بيتعرض بيبقى فيه صناع كتير علاقتهم بالعمل ده عمرها ما بتخلص.. هما ابتكروه من سنين وده شغلهم وفكرهم، السؤال بقى.. هل ينفع إن العمل يعيش ويفضل يأثر على سمعة الفنان ويفضل يسعد ناس أكتر منغير ما يكون للصانع ده حق فى إنه ياخد ولو عائد بسيط من اللى بيرجع من إعادة عرض الأعمال دي".

وتابع: "ده اسمه في الفن حق الأداء العلني وده قانون قديم بالمناسبة من 2002 ومطبق في أغلب دول العالم.. وفكرته مفعلة جدا على اليوتيوب مثلا.. وبيفضل صانع المحتوى يكسب عائد من من كل مشاهداته طول ما فيه ناس بتتفرج.. وكمان بيحمى اللى عامل الفيديو ده وما بيسمحش حد ياخد شغله وينزله فى مكان تاني".

واختتم: "فيه فنانين (والقصص كتير) انتهت حياتهم بظروف صعبة جدا فى حين إنه عنده رصيد ضخم جدا من الأعمال بتتعرض لغاية النهارده، أنا مع تفعيل قانون حق الأداء العلنى.. وعمر ما حماية حقوق المبدعين ما هتكون ضد الاستثمار أو المنتجين وأصحاب الأعمال بالعكس احنا كلنا فى مركب واحدة.. كلنا نفسنا فى صناعة أقوى قادرة تكمل وتسعد جمهور كبير كل يوم".