رشا مهدي: توترت في أول لقاء مع عادل إمام.. والزعيم سهل عليا كل حاجة
كشفت الفنانة رشا مهدي عن تفاصيل أول لقاء جمعها بالفنان عادل إمام، مؤكدة أنها شعرت بتوتر شديد في بداية التعاون معه، رغم أنها لم تكن تعاني من هذا الشعور في أعمالها السابقة.
رشا مهدي: توترت في أول لقاء مع عادل إمام
وقالت رشا مهدي، خلال لقائها عبر إذاعة «نغم إف إم»: «الحقيقة بصي، أنا في الأول شوية، في العادي عمري ما كان بيحصلي التوتر ده، لكن مع الزعيم حصل لي توتر، لأنه كان المفروض عندنا مشهد مهم وكبير بينا، اللي هو باخد منه الاعترافات، وده كان مشهد كبير ومهم قوي».
وأضافت أن عادل إمام ساعدها على التخلص من هذا التوتر منذ اللحظات الأولى، بعدما تعامل معها ببساطة وخلق أجواء مريحة داخل الكواليس.
وتابعت: «لكن الحقيقة هو دخل واتكلم، وخد الأمور ببساطة، واتكلمنا، وسهل الدنيا تماما، وعاوزة أقولك إن إحنا طول الوقت كنا في الكواليس قاعدين جنب بعض، وبنحكي، وبيحكي وبنتكلم في كل حاجة، بشكل إنساني وبشكل فني، وبنتكلم على المشهد اللي داخلين نصوره، وكان بيطمن جدا اللي حواليه».
وأوضحت أنها تشرفت بالعمل مع الزعيم في أكثر من عمل، مؤكدة أن هذه التجربة كانت من أهم المحطات في مشوارها الفني.
وقالت: «الحقيقة أنا كنت محظوظة إن أنا عملت مع الزعيم مسلسلين، والمسلسلين الحمد لله كان رد فعلهما حلو جدًا، وكانت الأدوار بتاعتي مميزة، في "العراف"، كان اسمي في المسلسل حنان، وأنا فاكرة كويس جدًا رد فعل الجمهور على المسلسل بشكل عام، المسلسل كله كان جميل جدًا، ولغاية دلوقتي، رغم إني كنت مشاركة فيه، بتفرج عليه كمتفرج وبحبه جدًا».
وأكدت أن العمل مع عادل إمام أضاف إليها الكثير على المستويين الفني والإنساني، مشيرة إلى أنها استفادت من نصائحه وخبراته طوال فترة التصوير.
وأضافت: «حبيت الدور جدًا، وفي نفس الوقت قدمني للناس بشكل مختلف، فأنا حقيقي كنت محظوظة جدًا، وإن المسلسل ده كمان قربني من الزعيم بشكل شخصي، اتكلمنا كتير في تفاصيل كتيرة جدًا، وكان عنده نصائح كتيرة، ومش قادرة ألخصها في جملة واحدة، لكن أهم حاجة اتعلمتها منه إن الممثل لازم يختار، ولازم يعرف يقول إمتى آه وإمتى لا».
واختتمت حديثها قائلة: «لما تشوف التزامه وحبه للمهنة، وتشوف قد إيه بيقدم الشخصية، وإزاي بيكون قريب من الناس كممثل وكفنان كبير، تعرف إنه فعلًا عظيم، الكلام عنه محتاج وقت كبير جدًا، واختصاره في كلمة صعب، لكنه فعلًا زعيم».
