يحيى إسماعيل لـ«مصر تايمز»: لا أختار أعمالي بالتخطيط.. والأقدار قادتني إلى «تحت السن»
كشف المخرج يحيى إسماعيل كواليس موافقته على إخراج مسلسل «تحت السن»، مؤكدًا أن الأمر لم يكن مرتبطًا بسبب محدد، وإنما جاء نتيجة توافق الظروف، معتبرًا أن العمل كان «قدريًا» منذ البداية.
يحيى إسماعيل : لا أختار أعمالي بالتخطيط
وأضاف، في تصريح خاص لـ«مصر تايمز»: «اللي شدني لإخراج مسلسل "تحت السن" مفيش حاجة معينة، هي أقرب لحاجة قدرية. طول الوقت الناس بتتكلم معايا عن أفكار أو مشاريع، وبيجيلي سيناريوهات كتير، لكن في مشاريع بتلاقي الإنتاج مهتم بيها، ومنصة شارية الفكرة. لما قريت السيناريو حسيت بقبول مبدئي، وقلت يلا نشتغل. وبحس إن في مشاريع مكتوب لها تكمل، ومشاريع لأ، والحمد لله المشروع ده مشي للنهاية».
وتابع: «أهم حاجة بالنسبة لي إن يكون في شخصيات بيحصل لها نوع من الفهم أو التطور في الوعي خلال رحلتها في أحداث المسلسل، ودي أكتر حاجة بركز عليها في أي عمل بقدمه».
واستكمل: «علشان القصة توصل بشكل واقعي، لازم كل شخصية تكون تصرفاتها مبررة، ويكون عندها دوافع وظروف وتربية وعلاقات بتفسر أفعالها، وده اللي بيخلي الأحداث مقنعة للمشاهد».
وعن اختيار أبطال العمل، قال: «بنعمل تجارب أداء لكل المشاركين، وبشوف كل ممثل هيقدم الشخصية إزاي. وفي ناس اشتغلت معاهم قبل كده، زي فرح يوسف وأحمد الرافعي، وعارف هما يقدروا يقدموا إيه. وكمان بنعمل جلسات قراءة ومناقشات لكل شخصية ودوافعها، لحد ما نوصل ليوم التصوير، وكل ممثل يكون فاهم الشخصية بشكل كامل».
