خالد الدرندلي: لاعبو منتخب مصر قدموا أداءً بطوليًا.. وكنا الأجدر بالفوز حتى اللحظات الأخيرة

أشاد خالد الدرندلي، رئيس بعثة منتخب مصر، بالمستوى الذي قدمه الفراعنة خلال البطولة، مؤكدًا أن اللاعبين قدموا أداء بطوليًا وكانوا الأقرب لتحقيق الفوز، رغم الإصابات التي تعرض لها الفريق، مشيرًا إلى أن المنتخب نجح في تقديم صورة مشرفة لمصر، ويمتلك عناصر واعدة قادرة على صناعة مستقبل أفضل للكرة المصرية.

وقال خالد الدرندلي خلال مداخلة هاتفية مع الإعلامي أحمد موسى في برنامج"على مسئوليتي" المذاع على قناة "صدى البلد": "لاعبينا رجالة وقدموا أداء بطولي، إحنا كسبانين اتنين صفر لحد الدقيقة 90، ولما جابوا هدف التعادل كانوا فرحانين عشان جابوا التعادل قدام مصر لاعبينا شرفونا ورجالة، وأداؤهم رجولي، وفيه إصابات حصلت، ورغم كل ده أدينا، وإحنا كنا الأجدر بالفوز، واللاعيبة فيها أسماء جديدة ونجوم جديدة بتدي بريق أمل للمنتخب".

وأضاف: "إحنا لما بنبص على سلوك اللاعيبة داخل وخارج الملعب واحترام اللوائح، بنلاقي جيلًا رائعًا ومنتخبًا رفع رأس مصر، وحط مصر في المكانة اللي تستحقها، وكنا على أعتاب دور الثمانية. إحنا عندنا أمل وهنستمر في هذا الارتفاع، وهنا الجمهور المصري بيولع شماريخ في الشوارع الأمريكية، والجمهور كله بيهتف وفرحان باللاعيبة".

وتابع: "كابتن محمد صلاح شكر كل اللاعيبة، واللاعيبة نزلت من الأتوبيس وراحوا يحتفلوا مع الجماهير، وآلاف الجماهير كانت بتحتفل باللاعيبة، ومصطفى شوبير وضع نفسه في حتة تانية خالص، وإحنا بنشكر كل اللاعيبة اللي شرفت مصر، والكل بيشيد بأداء اللاعيبة، بجد أنا اتشرفت إني كنت مع البعثة، ومن أحسن المعسكرات كانت معسكر منتخب مصر".

واختتم: "بنشكر الرئيس السيسي على التقدير الكبير لينا، واللاعيبة وصلتلهم التويتة وأثلجت صدورهم ورفعت معنوياتهم، لأنهم كانوا محبطين جدًا، إحنا عندنا الرغبة إننا نكمل هذا الإنجاز، وعندنا الرغبة إننا نستمر وندخل المرة اللي جاية، وخرجنا بقتال وكنا الأجدر بالفوز، وحطينا مصر في مكانة تستحقها، وتقدير الرئيس السيسي والشعب المصري، ده لوحده يعوض الحزن على المباراة، خدنا ثقة الرئيس السيسي والجمهور المصري، واللي جاي أحسن، وهنستمر في تطوير المنتخب، وهنوصل لأدوار الثمانية ونصف النهائي المرات اللي جاية، وسعيدين إننا بقينا في مكانة كبيرة، ومنتخبات كبيرة بقت خايفة مننا".