إبراهيم حسن: «إحنا مش شايفين ميسي».. هنلعب باسم مصر ونكتب التاريخ
هنأ الكابتن إبراهيم حسن مدير منتخب مصر، الشعب المصري والعالم العربي على فوز مصر وتأهلها إلى الدور الـ16، مردفًا: «الحمد لله، ربنا جعلنا السبب فيها، طبعًا نشكر الرئيس السيسي على مؤازرته وتشجيعه لينا مخلينا عاوزين نعمل كل حاجة ونكمل للآخر».
وأضاف إبراهيم حسن، خلال مداخلة هاتفية مع أحمد موسى ببرنامج «على مسئوليتي»، المذاع على قناة صدى البلد، قائلًا: «كلمة الرئيس السيسي وتهنئته لينا ده شرف لينا، وعاوزين نعمل حاجة لبلدنا، وإن شاء الله هنقاتل الماتش الجاي ونفرح الشعب المصري والرئيس السيسي».
وأكمل: «إحنا مش عملنا حاجة، دي أقل حاجة نقدمها لمصر، المصريين هنا في أمريكا وكندا عاملين حالة حلوة هنا، ومصر تستاهل مننا الكتير، وبنوعد حضرتك والشعب والرئيس السيسي إننا هنقاتل لإسعاد مصر».
وأردف: «أنا بشكر، من خلال حضرتك، اللاعبين المصريين والمنظومة والجهاز الفني، لأنهم رجالة وكانوا قد المسؤولية، رغم الظروف الصعبة جدًا، والجو حر أكتر من مصر، اللاعيبة رجالة، ومنتظرين منهم المباراة الجاية، إحنا هنا باسم مصر، أنا بشوف العلم، مينفعش مضحيش بكل حاجة، مصر هي تاريخ العالم والدنيا».
وأكمل: «شرف لينا أنا وحسام واللاعبين نرفع علم مصر، ونكتب سطرًا في تاريخ مصر، إحنا في مهمة وطنية، إحنا بنقاتل في الرياضة، إحنا بنحاول نجمل صورة مصر في الرياضة في العالم، ونحاول نعمل حاجة في المباراة الجاية لأنها حاجة تاريخية».
واستطرد: «أنا شوفت كل الدول العربية والخليجية، وشوفت حاجات على الفيسبوك، الناس بتتنطط مع كل هدف لينا، دي هي الوحدة العربية، تحية من خلال حضرتك للشعب الفلسطيني، مع كل الظروف اللي بيمروا بيها قاعدين وبيشاهدوا مباراة مصر، كل التحية ليهم مرة تانية».
وأكمل: «لما وصلنا لركلات الترجيح في مباراة أستراليا وربنا كرمنا، بس عاوز أقولك إحنا في كل معسكر وتدريب مع اللاعبين، في نهاية كل تمرين اللاعبين بيسددوا ركلات ترجيح، سواء مباريات إقصائية أو عادية».
وأردف: «مفيش غير فتوح ومحمد عبد المنعم صعب لحاقهم بالمباراة الجاية أمام الأرجنتين، وهنسافر إلى أتالانتا، ونعمل استشفاء للاعبين، صلاح بيجي نسخة تانية خالص مع معسكر منتخب مصر، صلاح بيلاقي نفسه مع حسام حسن، صلاح ما شاء الله مع حسام حسن بيؤدي في أكتر من مركز، وصلاح كنا بنشوفه مع مدربين سابقين، الكلام ده محصلش مع حسام».
وأكمل: «إحنا كل يومين سفر وبنشحن كل حاجة معانا هنا، وصلاح لما خرج في المباراة ضد إيران كان فيه إصابة، وطلع، وفيه مجهود اتعمل علشان يلحق مباراة أستراليا، إصابة صلاح في العادي تاخد 10 أيام على الأقل».
وأردف: «حسام مذاكر ومستعد لكل مباراة كأنها امتحان، حسام بيذاكر كل فرقة، حسام بيحفظ اللاعبين كل حاجة عن الفريق اللي قدام، علشان كده تلاقي اللاعبين عارفين كل حاجة، كمان حسام مدي اللاعبين كل الثقة، ومن أول يوم اللاعبين قالوا لحسام: إحنا مش عاوزين نروح، قولنا ليهم طلعوا الفكرة دي من دماغهم وإحنا مكملين هنا».
وأكمل: «بنقول للاعبين العبوا وأدوا اللي عليكم، إحنا مش هنعرف هنلعب تاني كأس عالم ولا لا، مش عارفين عمرنا فيه كام كأس عالم، بنقول للاعبين: أنتوا العبوا واكتبوا التاريخ دلوقتي، هيثم حسن إمبارح قدم مباراة كبيرة، وكان جاهزًا للمشاركة، وحسب ظروف المباراة بيتم إشراكه».
وأشار إبراهيم حسن إلى أنه تابع: «إحنا مش شايفين ميسي، مش شايفينه، بنقول للاعبين انزلوا العبوا ومتشوفوش أنتوا بتلعبوا مين، هما عندهم ميسي، فإحنا في مصر عندنا محمد صلاح، و26 ميسي، وإن شاء الله ربنا يكرمنا».
