مجدي عبد الحليم لـ«مصر تايمز»: «المعاش مش مكفينا والوسط الفني نسي جيلنا»
كشف الفنان مجدي عبد الحليم عن حبه الشديد الكبير للمسرح، حيث يعمل حاليًا في مسرح الدولة من خلال مسرحية "الحلم حلاوة"، مؤكدًا أنه سعيد بالتجربة والعمل على خشبة المسرح.
مجدي عبد الحليم : المعاش مش مكفينا والوسط الفني نسي جيلنا
وقال في تصريح خاص لـ"مصر تايمز": "بالنسبة للأدوار، بيجيلي شغل، لكن أنا مبقبلش أي دور وخلاص، لازم الدور يعجبني ويناسبني. آخر دور عملته كان مع الأستاذ محمد سلام، وكان عنده أكتر من توأم في العمل، وكمان شاركت في فيلم (المستريحة)، لكن الفيلم نفسه مظهرش أوي".
وتابع: "الدكتور أشرف مش بإيده حاجة، ومش بإيده يشغل حد، لأن دي في الآخر مش بإيده. وأنا الحمد لله بيتعرض عليا أدوار، لكن باختار الأدوار المناسبة ليا، وعشان كده ظهوري في السينما والتليفزيون قليل".
وأضاف: "الدنيا اتغيرت، ومبقاش حد يعرف جيلنا زي زمان، لكن الناس في الشارع لسه عارفاني، وكذا مرة اسمي طلع تريند على الإنترنت، والناس كانت بتسأل: الفنان مجدي عبد الحليم فين؟".
واستكمل: "أنا كان عندي عربية وبعناها، وبقينا بنتحرك بأوبر. ومن يوم واحد بس كنت راكب المترو، والدنيا اتقلبت وصوروني، والناس كانت بتسأل: الفنان ده فين؟".
ووجّه رسالة إلى الوسط الفني قائلًا: "أنا بطلب من الوسط الفني يبص للفنان مجدي عبد الحليم، لأن مش المفروض تاريخ الناس القديمة يتهمل بالشكل ده، ولازم يكون فيه اهتمام بالأجيال بتاعتنا".
وأضاف: "أحيانًا بعض المخرجين بيعرضوا عليا أدوار صغيرة وأنا مبوافقش عليها. ومن أيام مسلسل (العتاولة) الجزء الأول لحد النهارده، الناس ممكن تتساءل أنا عايش إزاي ومنين".
وتابع: "والله السنين اللي فاتت عملت المستحيل، وبرامج كتير استضافتني، وكنت مستني حد يتحرك ناحيتي، لكن للأسف ده محصلش. أنا الحمد لله في كامل صحتي وفي كامل طاقتي الفنية، وبشتغل وبصور كل أسبوع، وعندي ورشة فنية بصور فيها أعمال وبتتعرض على قناة كايرو دراما، والناس بتشوفني على التليفزيون في عمل إنتاجي، وكمان عملت فوازير رمضان السنة دي".
واختتم حديثه قائلًا: "بحاول بكل الطرق أحسس الناس إني موجود، لكن للأسف مش عارف المشكلة فين. المعاش يدوبك، وباقي الشهر بنقول: يا رب. مفيش تليفون بيرن زي زمان أيام الأستاذ مجدي أبو عميرة، ومفيش حد بيسأل علينا. ربنا كريم ومبينساش حد، لكن إحنا بنعاني، وفي فنانين كتير من جيلنا عايشين على المعاش، والمعاش مش مكفيهم. الوسط الفني لا يرحم أحد، إلا من رحم ربي، وربنا يكون في عون الجميع".
