فريدة سيف النصر لـ«مصر تايمز»: بعد رحيل الأهل والأحباب.. العيد مبقاش عيد
حرصت الفنانة فريدة سيف النصر على تهنئة الجمهور بمناسبة عيد الأضحى المبارك، متمنية للجميع أيامًا سعيدة مليئة بالخير والبركة، وقالت: «كل سنة وأنتم طيبين، وعيد سعيد عليكم جميعًا».
فريدة سيف النصر : بعد رحيل الأهل والأحباب.. العيد مبقاش عيد
وأضافت، في تصريح خاص لـ«مصر تايمز»: «العيد بيفرق جدًا مع الواحد مع مرور السنين، وبيختلف من وقت ما الأب والأم بيروحوا. زمان كان للعيد طقوس مختلفة ومبهجة جدًا، كنا بنعيشها بكل تفاصيلها، من الهدوم الجديدة، والعيدية، ولمّة العيلة، وضحكة البيت اللي كانت مالية المكان. شوفنا أيام جميلة جدًا عمرها ما بتتنسي».
وتابعت: «بعد كده الواحد بيكبر، والناس بتبدأ تقل واحدة واحدة، الأب والأم، وبعدهم إخوات وأحباب، فتحسي إن الدنيا بتنقص، وإن لمة العيد مبقتش زي زمان. العيد في الأساس لمة، ولما اللمة بتتفركش بتحسي إن فرحته نفسها قلت».
واختتمت فريدة سيف النصر حديثها قائلة: «حتى تجمعات زمان مع الأصدقاء والزملاء كانت مختلفة جدًا، كنا دايمًا بنتقابل ونفرح مع بعض، لكن دلوقتي كل واحد مشغول في حياته. فرحة العيد نفسها مبقتش موجودة زي الأول للأسف، لكن الحمد لله على كل حال، وربنا يجعلها أيام خير وبركة على الجميع».
