بمناسبة عيد ميلاد الزعيم.. إلهام شاهين لـ«مصر تايمز»: "عادل إمام وش الخير عليا وله فضل كبير”

حرصت الفنانة إلهام شاهين على توجيه رسالة خاصة إلى الزعيم عادل إمام بمناسبة عيد ميلاده، مؤكدة أنه صاحب فضل كبير على مشوارها الفني، وأنه واحد من أهم النجوم في تاريخ الفن العربي.

إلهام شاهين عن عادل إمام: “وش الخير عليا وله فضل كبير في حياتي”

وقالت إلهام شاهين في تصريح خاص لـ«مصر تايمز»: “كل سنة والنجم الكبير عادل إمام طيب وبخير، وربنا يديله الصحة ويخليه لينا. طبعًا عادل إمام وش الخير عليّا، وله فضل كبير جدًا في حياتي الفنية”.

وأضافت: “أول مرة أقف قدام كاميرا في حياتي كانت في فيلم أمهات في المنفى سنة 1981، قصة الدكتور يوسف جوهر، وإخراج محمد راضي، وكان البطل هو عادل إمام، وكان ليا الشرف إني أبدأ مشواري الفني قدام نجم النجوم”.

وتابعت: “وبعدها بحوالي 4 سنين، كانت أول بطولة في حياتي من خلال فيلم الهلفوت سنة 1985، بطولة عادل إمام، وتأليف وحيد حامد، وإخراج سمير سيف، والحقيقة إن الفيلم ده ساهم في صناعة نجمة، لأني كنت بشتغل مع أسماء كبيرة جدًا”.

واستكملت: “مش بس كانت أول بطولة ليا، دي كمان كانت أول جائزة أحصل عليها كأفضل ممثلة عن فيلم الهلفوت، وبعدها اشتغلت معاه في فيلم رمضان فوق البركان، واللي كان فيلم جماهيري جدًا وقعد في السينما فترة طويلة، فاشتغلت معاه في 3 أفلام وكلهم كانوا ناجحين”.

وأكدت إلهام شاهين أن الزعيم كان داعمًا كبيرًا للوجوه الجديدة، قائلة: “عادل إمام إنسان طيب جدًا، وكان بيساعد الوجوه الجديدة ويساندهم، وواقف جنبي دايمًا، وممكن يغششهم حاجات تساعدهم في التمثيل، وأنا عمري ما هنسى فضله عليّا”.

وأضافت: “هو شخصية ذكية جدًا، والواحد لازم يتعلم منه في اختياراته، لأنه قدر يفضل نجم كبير على مدار 50 أو 60 سنة، وده بسبب ذكائه في اختيار الأعمال اللي توصل للجمهور وتحقق جماهيرية كبيرة في كل الوطن العربي”.

واختتمت حديثها قائلة: “دايمًا لما بسافر أي بلد أو مهرجان بيسألونا عن عادل إمام ويطمنوا عليه، لأنه محبوب جدًا في كل الوطن العربي، وطبعًا هو مشرفنا في مصر، وبقوله كل سنة وهو طيب، وعيد ميلاد سعيد، وربنا يخليه لينا، وإحنا دايمًا فخورين بنجم النجوم عادل إمام”.