مصطفى بكري عن أزمة العدادات الكودية: إزاي نساوي بين السارق والملتزم؟

كشف الإعلامي مصطفى بكري تفاصيل أزمة العداد الكودي، ومشكلة سرقة الكهرباء.

وقال بكري خلال لقائه التليفزيوني: «النهارده فيه أزمة ناس كتير قوي مش واخدة بالها من خطورتها، ناس فجأة لقت فاتورة الكهرباء اتحولت من شرائح استهلاك عادية كانت بتبدأ من 68 قرشا، لسعر ثابت وصل لـ 274 قرش للكيلو، يعني مواطن كان بيدفع رقم بقى يدفع أضعافه فجأة، من غير مقدمات، ومن غير ما يكون فاهم أصل الحكاية.

وأضاف مصطفى بكري: «الرواية الرسمية بتقول إن العداد الكودي معمول للناس اللي بتسرق كهرباء، يعني واحد واخد وصلة مخالفة، اتمسك، فبدل ما يفضل سارق يركبوله عداد كودي ويتحاسب بسعر أعلى، والحقيقة على الأرض مختلفة تمامًا، وفيه ناس كتير جدًا عندها عداد كودي وهي أصلًا مش سارقة كهربا، واحد بنى عمارة وركب عداد إنشائي أثناء البناء، وبعد ما خلص راح يركب عداد عادي، اتقاله لا، ليه؟، عشان فيه بروز زيادة، أو دور مخالف، أو جزء أو شقة في عقار عليه مخالفة، يعني المخالفة هنا، بنائية تخص الحي والمحليات، مش سرقة كهرباء».

وتساءل مصطفى بكري: «إيه علاقة وزارة الكهرباء بمخالفة الحي؟، ولو المبنى خطر فعلًا، ليه الكهرباء متوصلة أساسا؟، ولو مش خطر، ليه المواطن بيتعاقب في سعر الكهرباء؟، وده مربط الفرس، لأن اللي حاصل حاليًا إن فيه خلط غريب جدًا بين سارق كهربا، وبين ساكن في عقار مخالف، والاتنين بيتحطوا في سلة واحدة، يعني مواطن اشترى شقة في عمارة، يطلع صاحب العمارة مخالف، تقوم الدولة تحاسب الساكن نفسه كأنه متهم، طب المواطن ذنبه إيه؟، هو اللي طلع الترخيص؟، هو اللي سمح بالبناء؟، ولا الجهات المسؤولة كانت سايبة المخالفات تكبر سنين؟».

وواصل مصطفى بكري: «إحنا بنتكلم عن حوالي 2.6 مليون عداد كودي اتركبوا خلال أقل من سنتين، الأزمة بقت واقع اجتماعي كامل، مش مجرد حالات فردية، وزارة الكهرباء بتقول إن العداد الكودي، لا يُعتد به كإثبات سكن، يعني المواطن يدفع كهرباء عادي جدًا، لكن الإيصال نفسه ماينفعوش في أي ورق رسمي، يدفع أغلى وفي الآخر يفضل وضعه غير مستقر، المشكلة هنا مش في فكرة التنظيم، بالعكس، أي دولة لازم تنظم ملف الكهرباء والمخالفات».

واختتم مصطفى بكري: «المواطن حاسس إنه بيتحاسب مرتين، مرة بسبب مخالفة غالبًا مش هو اللي عملها، ومرة تانية في فاتورة كهربا مضاعفة، الدولة من حقها تواجه سرقة الكهرباء، وتحاسب المخالف، وتحافظ على الشبكة، لكن في المقابل، لازم يبقى فيه فرق واضح بين حرامي كهربا، وبين مواطن ساكن في عقار عليه مخالفة إدارية أو إنشائية».