إبراهيم حسن: عملنا في فرن عيش لتغطية مصاريف اختبارات الأهلي

في حوار مليء بالذكريات الإنسانية والتفاصيل المؤثرة من رحلة الصعود إلى عالم كرة القدم، كشف إبراهيم حسن، مدير منتخب مصر، كواليس بداياته مع شقيقه التوأم، والصعوبات التي واجهاها منذ الطفولة، مرورًا بفترة اختبارات النادي الأهلي.

وقال إبراهيم في تصريحات تليفزيونية عبر قناة "أون سبورت": "احنا أصغر اتنين في العيلة وتوأم، وعلشان كده كنا دايمًا مع بعض، وإخواتنا كانوا بيساعدونا وبيخافوا علينا". 

وتابع: "والدي الله يرحمه توفي واحنا صغيرين أثناء وجودنا في اختبارات الأهلي، وفي شهر رمضان، وتوفى بعد ما نجحنا ودخلنا الأهلي ومشافناش بنلعب هناك".

وأكمل: "العيلة كلها كانت أهلاوية، لكن فكرة إننا نلعب كرة أصلًا ماكنتش في بالهم، وروحنا الاختبارات من غير ما نقول لحد، وخبينا الموضوع عنهم لحد ما نجحنا، وساعتها قولنا لهم وكانوا فرحانين جدًا".

وأردف: "فلوس الاستمارات كنا بنجمعها في الإجازة، واشتغلنا إحنا الاتنين في فرن عيش، كنا بنقبض يومية بـ15 قرش وربع جنيه، لحد ما جمعنا فلوس الاستمارة، وكنا مش عايزين نقلق أهلنا لأنهم كانوا خايفين علينا نروح وسط القاهرة".

واسترسل: "الفترة كلها كانت في رمضان، وكنا بنلعب، وفي اليوم الأخير من التصفيات النهائية اتأخرنا، وقلبوا علينا الدنيا، ورجعنا البيت وإحنا خايفين، ولما قولنا لهم إن معانا الكارنيه الأمور هديت"..

واختتم إبراهيم حسن حديثه قائلا: "كنت زعلان جدًا إني ألعب في مركز الظهير، وقلت للكابتن عبد العزيز عبد الشافي إن الكابتن عادل طعيمة قال هألعب باك يمين، وكنت مش عايز المركز ده، لكن هو كان شايف حاجة تانية، وفعلاً كان عنده رؤية صح، ولعبت في المنتخب والفريق الأول، ولعبت في جميع مراكز الملعب".